陳嘉佳細細粒曬減肥一周年成果 自覺腰粗打算再減：減多30會再完美啲

陳嘉佳（細細粒）近年將工作重心轉到內地，擔任「吃播主」及帶貨，深受內地網民歡迎，吸金力極強。2023年，細細粒因健康響起警號而決心減肥，最高峰286磅一度減至110磅左右，於社交平台大曬泳衣、吊帶衫及著婚紗嘅照片，更曾拍片分享減肥成果，以及即場量度身體尺寸數字，其腰圍由135cm減至85.5cm，足足有近50cm。雖然唔少網民大讚細細粒減肥減得好成功，輪廓變得突出兼減走成個碼，但日前細細粒藉「減肥一周年」PO出自拍照，直言覺得自己條腰粗，希望再減多30磅。

細細粒於社交平台分享穿上Bra Top對鏡自拍嘅照片，表示終於減肥一周年及露腰：「2025年啦，終於終於減肥一周年啦，亦終於終於可以露條腰腰出黎啦，今年夏天應該可以着到我最想着嘅…….露腰泳衣」，不過細細粒覺得自己條腰幾粗吓，打算再減肥：「本來諗住已經減完，睇嚟再減多30會再完美啲（實在條腰就真係幾粗吓）。」此外，細細粒憑着堅持及唔放棄嘅心態減磅，更於社交平台大曬公開體檢報告：「我已經高血糖沒了，高血壓沒了，三支甘油酸沒了，膽固醇沒了，脂肪肝沒了……我健康了」唔少網民都表示細細粒好犀利，大讚佢越嚟越正，不過都有網民叫細細粒唔好減肥過度，最緊要係健康同自己開心。又建議佢搵健身教練操練，修靚身形線條。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！