萬千星輝頒獎典禮2024︳龔嘉欣張振朗爆冷拎男女主角網民鬧爆 最佳劇集公布前微博已流出賽果？
《萬千星輝頒獎典禮2024》尋晚舉行，雖然總經理曾志偉表明藝員得獎與否同係咪「親生仔女」（TVB合約藝人）、簽咗長約冇關，強調係由觀眾同同事投票選出，因此各得獎者係實至名歸。不過今屆得獎賽果極具爭議性，幾乎每個獎都惹來討論，首度成為視后嘅龔嘉欣更成為眾矢之的。
最佳女主角賽前外界視《黑色月光》楊茜堯同《巾幗梟雄之懸崖》胡定欣為大熱，而《黑色月光》嘅林夏薇同《婚後事》陳自瑤就被視為黑馬，呼聲都比《企業強人》龔嘉欣更有勝算。但喺公布最後五強時，胡定欣意外落馬已經出人意表，由龔嘉欣力壓演出受盛讚嘅楊茜堯封后，更加惹來網民抨擊。喺TVB fb發放嘅龔嘉欣得獎片段post，唔少人留言認為楊茜堯比龔嘉欣更值得拎視后，甚至以Wyman不值鄧萃雯喺視后之爭輸俾黎姿嘅金句「我寧願拎唔到人地戥我唔抵，好過拎咗人地覺得我唔值」嚟回應。亦有網民對於龔嘉欣花唔少篇幅感謝高層曾勵珍直斥係「擦鞋」。
至於同龔嘉欣合演過《靈戲迫人》、《堅離地愛堅離地》嘅張振朗，首度榮登視帝一樣被鬧爆，但網民明顯「輕手」得多。唔少人認為《婚後事》羅子溢演出有突破，應該係五強之中最匹配視帝名銜，批評張振朗嘅多數只係認為佢「未夠班」。
而壓軸大獎最佳劇集同樣出現爭議，有網民指TVB官方微博喺大會宣讀結果前，已經出post祝賀《反黑英雄》得獎，質疑內部一早知道獎項誰屬。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
