萬千星輝頒獎典禮2024紅地氈 點評｜陳曉華鍾柔美驚喜透視裝上陣 胡定欣黃袍加身2.0

TVB年度盛事《萬千星輝頒獎典禮2024》昨日（19日）假澳門上葡京綜合渡假村上葡京禮堂舉行，與過往一樣，除咗獎項結果令人關注，一班女藝人行紅地氈嘅造型亦成為討論話題。即睇一班女藝人嘅靚靚打扮，又有邊位出現時裝車禍。

萬千星輝頒獎典禮2024紅地氈｜王敏奕
王敏奕勇奪「最佳衣著女藝人」 獎項，佢喺行紅地氈時身穿桃紅色平口晚裝，傘裙剪裁裙身佈滿皺摺設計，加上桃紅色極搶眼。於得獎時，王敏奕就已換上一條黑色露背裙，配合羽毛細節，高貴奪目。

萬千星輝頒獎典禮2024紅地氈｜鍾柔美
上個月踏入18歲嘅鍾柔美（Yumi）擺脫過往少女夢幻感嘅打扮，改以黑色條子透視連身裙現身紅地氈，大晒纖腰及苗條身形，展現小性感一面，充滿新鮮感。

萬千星輝頒獎典禮2024紅地氈｜陳曉華
曾經喺《萬千星輝頒獎典禮2022》得到「最佳衣著女藝人」 獎項嘅陳曉華（Hera）雖然今年無獎，但造型一樣有驚喜；黑白晚裝兩側採用透視設計，露出纖細雪白腰肢，性感又高貴。

萬千星輝頒獎典禮2024紅地氈｜馮盈盈
馮盈盈嘅紅地氈造型大多都唔會令人失望；昨晚（19日），馮盈盈以Deep V魚尾裙出席《萬千星輝頒獎典禮2024》，Deep V設計開到落肚臍，極性感，大型多層魚尾裙擺更加成焦點，佢就透露其晚裝靈感係參考美人魚，每次移動都要有人幫手搬裙擺。

萬千星輝頒獎典禮2024紅地氈｜陳懿德
陳懿德昨日（19日）擔大旗成為頒獎典禮主持，亦勇奪「最佳女新人」獎項。身材出眾嘅佢以Deep V晚裝上陣，佢曾透露揀白色裙嘅原因係因為首次角逐幾個獎項，代表好似白紙一張。至於擔任司儀時，陳懿德則換上黑色平口晚裝，其粉紅色傘裙如同花瓣蔓延全身，充滿活力。

萬千星輝頒獎典禮2024紅地氈｜胡定欣
胡定欣可謂全晚最密實嘅女星，以一身金色褲裝造型登場，Sharp爆全場，不過就被網民笑指佢似聖鬥士，又指有當年家燕姐黃袍加身嘅感覺，出晒事。

萬千星輝頒獎典禮2024紅地氈｜龔嘉欣
龔嘉欣憑《企業強人》首奪「最佳女主角」獎項，佢就穿上Deep V紅白色薄紗禮服出席頒獎典禮，剪裁略為累贅，腰部位置以紅色花卉細節作點綴，不過就被指似大肚婆用嚟遮肚之用。

萬千星輝頒獎典禮2024紅地氈｜何沛珈
何沛珈於過往頒獎典禮造型多以少女風為主，極少出事；今年頒獎典禮以黑色吊帶晚裝亮相，表現平穩。不過，其頭飾就激似樹葉，令整體造型扣分。

萬千星輝頒獎典禮2024紅地氈｜姚焯菲
姚焯菲（Chantel）轉以成熟打扮出席是次頒獎典禮，孖住陳浚霆、孔德賢行紅地氈。姚焯菲穿上露膊黑色上衣搭配黑色長裙呈現大個女嘅感覺，不過其剪裁就令佢有啲顯肥。

萬千星輝頒獎典禮2024紅地氈｜高海寧
高海寧選以黎巴嫩設計師高訂服現身紅地氈，粉橙色單肩設計搭配裙身嘅閃片細節，滲出仙氣，絕對不輸其他性感女藝人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！