「亞視霆鋒」伍偉樂轉行揸巴士養四名子女 網民：有家庭責任感的男人最帥

前亞視藝人伍偉樂因為外貌似謝霆鋒，於是被封為「亞視霆鋒」，過往主要為兒童節目擔任主持以及拍攝劇集，2016年亞視被取消廣播牌照，伍偉樂回復自由身，工作量大減，甚至淡出娛樂圈。及後，伍偉樂做過郵局職員 、波鞋店店員、婚宴司儀、汽水機商人等工作，但收入始終唔穩定，要養老婆及四名小孩嘅伍偉樂喺一次搭巴士期間見到招聘車長廣告，其人工比佢喺亞視嘅底薪高數百元，所以應徵做九巴車長，更曾經大方晒出員工證，網民激讚伍偉樂甘願放下明星光環，擔起一家之主嘅責任夠晒承擔。

伍偉樂早前由九巴轉至城巴工作，更於小紅書PO出以「香港明星轉開公交車」為題嘅影片，分享大仔和龍鳳胎孻仔孻女企喺巴士站等爸爸駕駛嘅795X巴士到站，兩名兒子興奮得喺到擺動身體，當伍偉樂見到仔女上車後就向鏡頭拋眉弄眼，露出一幅慈父笑容。伍偉樂於帖文寫道：「前亞洲電視藝員伍偉樂揸巴士，看看小朋友等到自己爸爸開的巴士，又期待又開心又好奇，爸爸來了，除了平時會開793 ，我仲會開795X，歡迎大家快快來偶遇」。唔少網民都大讚伍偉樂係真漢子：「用自己雙手腳踏實地搵食是最厲害的」、「有家庭責任感也有社會責任感的男人最帥」、努力的人在哪裡過得都不會差，祝你每日：前程似錦！」、「有什麼奇怪的，在香港明星亦是一份職業罷了」、「我覺得你很努力，是個很合格的爸爸」等等。亦有網民表示做車長起碼收入穩定，家屬又可以免費搭車：「真漢子樂哥哥」。

對於被讚積極向上等，伍偉樂於小紅書亦有回覆網民，更回應「孩子是我的能源」、「我不吃，孩子也要吃」等等，被網民大讚。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！