萬千星輝頒獎典禮2024 預測丨盤點歷屆男配角 今年邊個攞獎有路捉？

《萬千星輝頒獎典禮2024》週日假澳門舉行，除了焦點誰是視帝視后之外，最佳男女配角同樣備受關注，今屆《巾幗梟雄之懸崖》蕭正楠表現搶眼呼聲最高，但男配角獎不同視帝，所謂「親生仔血緣」只屬因素之一，且看過去十九屆得獎者族群分佈，再預測今屆男配角熱門人選。

「親生仔血緣」

從來有傳聞親生仔女有絕對優勢，意思指經理人合約藝人得獎，對公司有可量化利益，回顧過去歷屆男配角，屬「親生仔血緣」的確不少，最經典例子莫過於2009年，謝天華在《學警狙擊》飾演的「Laughing哥」在劇中犧牲，當晚粉絲在Facebook開悼念專頁，引來大批網民留言致祭，所謂角色成功加上親生血緣，父母又點會唔錫呢？至於經常有知情人士透露，有時普通合約藝人一旦得獎，之後都會變成「親生一樣」，又有另一個例子，實力派演員古明華2012年在《巴不得媽媽》飾演角色「蘇基」，由於表現太出色引來坊間熱捧，最後順利奪得最佳男配角，及後跟公司轉簽經理人合約，至於是否傳聞中「簽約換獎」？相信只有得獎者先知，不過本已是親生仔的蕭正楠今年一人分飾三角表現亮麗，難怪奪獎呼聲高唱入雲。

「優質潛力股」

作為全香港最大電視台，旗下藝人眾多，就算「親生仔女」都有大有細，莫講話「新人獎」、「飛躍進步獎」，即使演出機會要守規矩排隊等，但係每個藝人條件不同，假如遇上新人有外型有演技，簡稱「優質潛力股」，公司有豈會待薄佢？最佳例子周嘉洛，在《愛·回家之開心速遞》飾演「金城安」一角活潑討喜成功入屋，所以在2019年獲得最佳男配角，同樣例子於2021年再發生，朱敏瀚藉《換命真相》擊敗一眾強手爆半冷獲獎，且看今屆阮浩棕能否以潛力股姿態上台。

「甘草實力派」

假如視帝視后大多數為經理人合約藝人，能叫高價拍廣告剪綵登台出席活動等等，更替公司賺取豐厚利潤，那最佳男女配角就更空間頒發予資深、有演技、形象正面的「甘草實力派」，令頒獎禮更具認受性。過往有《甜孫爺爺》夏雨、《巾幗梟雄之義海豪情》麥長青、《My盛Lady》許紹雄、《老表，你好hea！》蔣志光、《梟雄》韋家雄、《香港愛情故事》白彪等等，全部幾十年陪着觀眾成長，直接啲講，前輩攞獎無人投訴，至於今屆甘草實力派只有《企業強人》姜大衛一人，John哥剛於去年香港電影金像獎，憑《白日之下》奪得最佳男配角，假如星期日同樣上台獲電視獎，就更加實至名歸，試問有邊個敢講黑哨造馬？

綜觀以上分析，你對萬千星輝最佳男配角又可有其他心水？不過唔使急，再過兩日澳門揭盅，且看今年會否爆大冷。