鄧紫棋G.E.M內地綵排鬧「離x晒大譜」片段瘋傳 網民反而讚︰佢仲識講廣東話
自從參加《我是歌手》後走紅，鄧紫棋G.E.M多年來主力喺內地發展，做出一定成績。早前G.E.M舉行嘅I AM GLORIA巡迴演唱會喺廣東肇慶進行最後一站，綵排期間有網民喺場外偷拍到G.E.M疑似因為音響問題，開聲鬧工作人員！
根據片段，G.E.M日間為演唱會做音響檢查（soundcheck），但未能調校出啱G.E.M心水嘅效果，G.E.M似乎有不滿，拎住咪講「冇Reverb（殘響）呀。呢度係完全冇。真係離乸晒大譜，黐孖筋」，隨後再指示工作人員「你細少少人聲俾我啦咁」。G.E.M雖然冇爆粗，但由語氣都用字都聽得出幾「倔」。片段流出後外界有2種解讀，有報導指G.E.M唔滿意音響人員冇調校好Reverb，亦有網民認為G.E.M係唔高興場地嘅空間令Reverb唔夠好，令佢要鬧「黐孖筋」。
雖然用字粗俗，但係唔少網民都撐甚至讚G.E.M，認為佢去到呢個級數都對音色認真，好難得；亦有唔少人話G.E.M仲識講廣東話，而且掌握得好好，抵讚。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
