萬千星輝頒獎典禮2024︳陳妙瑛向海嵐23年首度幕前合體 《無頭東宮》爆冷好收視 兩女主角0歲月痕跡

尋晚TVB《萬千星輝頒獎典禮2024》搵2002年劇集《無頭東宮》女主角陳妙瑛同向海嵐為馬來西亞獎項擔任頒獎嘉賓，令唔少觀眾好大反應。兩位先後「入五」嘅港姐睇落好似無歲月痕跡，簡直同當年喺電視睇見一樣咁靚。

《無頭東宮》可以話係陳妙瑛同向海嵐嘅代表作，2002年推出時被安排喺「炮灰檔」農曆年播出，但係好劇有好報，收視最高錄得37點，陳妙瑛更成為當年視后熱門，但因為陳決定離巢而未有封后。向海嵐早前喺YAHOO娛樂圈《娛樂訪談》中提到， 《無頭東宮》係由一班被冷落嘅人湊埋一齊，仲爆陳妙瑛當年頂得好辛苦。但係「向海」話《無頭東宮》拍得好融洽，而且事隔多年都仲有觀眾記得，令佢好開心。即使頒完獎接受訪問，陳妙瑛同向海嵐都係話當年拍劇拍得好開心，劇組嘅通訊群組日日都會有人同大家講早晨，得閒仲會出來見面。被問到會否重返幕前，陳妙瑛都承認有時戲癮發作，但係時間有限，所以暫時未有考慮。

曾經係TVB兩大花旦嘅陳妙瑛同向海嵐，非但冇因為爭上位面左左，兩位私底下甚為老友，不時都有聚會。去年向海嵐為音樂劇《我們的青春日誌》飾演校長一角嘅演出接近尾聲，陳妙瑛同《無頭東宮》劇中飾演2位「皇兒」嘅敖嘉年及杜大偉一齊去睇向海嵐嘅演出。

陳妙瑛同向海嵐都係港姐出身，陳妙瑛後來離開TVB轉投商界，現時係集團CEO。向海嵐同樣毅然退出幕前，曾經轉型做OL，近年重返幕前，並經營珠寶及保健品生意。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！