黎耀祥挑戰四封視帝 被劉青雲批《巾幗4》演得麻麻 網民：又評得幾中肯

一年一度嘅TVB《萬千星輝頒獎典禮2024》將於周日（19日）晚上舉行，各個獎項嘅戰況都非常激烈，尤其係視帝視后。三屆「視帝」黎耀祥亦憑《巾幗梟雄之懸崖》角逐「最佳男主角」，如果今屆再拎嘅話，佢將會打破電視史紀錄，成為獲得視帝最多嘅人。最近佢接受傳媒訪問，除咗表示以平常心面對之外，佢仲話曾因劉青雲對佢喺《巾幗梟雄之懸崖》嘅表現唔夠好，而打擊自信心。

喺接受傳媒訪問時，黎耀祥表示自己曾因劉青雲對佢喺《巾幗梟雄之懸崖》嘅演技：「呢個戲演得麻麻哋㗎咋！」及指冇《巾幗梟雄之義海豪情》劉醒做得咁好。黎耀祥就話劉青雲冇講到原因，所以佢估劉醒呢個角色比較踏實，而劉青雲就比較鍾意沉得住嘅人物。雖然黎耀祥有被打擊自信心，不過就覺得劉青雲嘅意見係啱，佢自己亦認同喺演出《巾幗梟雄之懸崖》係啱啱合格，有好多不足嘅地方，所以佢亦對自己嘅表現感到失望。另外，佢仲彈自己近年有幾套劇都演得唔好，表示除咗《殺手》好啲，《輕.功》只可以話OK，而《拳王》就冇考慮到氣氛，所以將成件事壓得太低沉。

被問到會唔會被劉青雲打擊爭奪「視帝」嘅信心，黎耀祥就話唔會只係得佢，佢只係其中一個。佢自己會會綜合好多意見去睇呢件事，佢唔會用人哋嘅讚賞嚟做標準。因為讚賞可能係出於好感、同情分、體諒或其他原因，相反俾人彈先要留意。

至於今屆視帝視后嘅心水，黎耀祥就特別點名張振朗及張曦雯；同時覺得陳豪、羅子溢、楊茜堯及林夏薇都好有機會，不過如果計埋私人感情嘅話，佢就想《巾幗梟雄之義海豪情》拍檔胡定欣奪視后寶座。

唔少網民都表示認同劉青雲嘅講法，留言話「劉青雲竟然有睇」、「又評得幾中肯」、「做完柴九之後真係無咩大進步」、「真係老友先同你講」、「劉醒真係佢既peak」、「佢好似之後冇乜突破」、「老友講事實姐，公道講句巾幗4都差巾幗2幾十條街，套野劇情前後九唔搭八，演得幾好都無用」及「黎耀祥演技高峰咪豬八戒囉」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！