何艷娟失婚後生活極奢華 東京旅行豪歎五星級酒店行政套房 房價達5位數

2014年香港小姐季軍何艷娟於2018年7月與擁有30億身家及比佢年長40歲嘅富商吳志誠閃婚，不過結婚8個月後火速離婚。有傳，何艷娟收咗3億元贍養費，所以即使失婚都過住貴婦生活，不時進出馬場、坐遊艇出海及食酒店下午茶等奢華日子，又於IG大曬名牌手袋。此外，何艷娟不時周遊列國，繼去年年尾到倫敦旅行過聖誕，早前又再飛到日本東京，所入住嘅酒店一晚房價更加係大部分打工仔一個月人工。

何艷娟分享多張於酒店房嘅照片，其中佢就PO出於房內食早餐嘅照片，身穿白色毛毛吊帶裙嘅何艷娟展現煞食S形身材，唔少網民都留言心心眼Emoji，又激讚何艷娟好靚。何艷娟於照片中標示所入住嘅酒店為日本著名五星級酒店，房型係一晚房價至少1萬2千港元嘅行政套房。

何艷娟入行後拍劇機會唔多，曾於《宮心計2深宮計》飾演丫鬟，較多戲份則係於《愛·回家之開心速遞》飾演大龍生（羅樂林飾）和三太（樊亦敏飾）女兒龍作蜜。2020年離巢TVB後，何艷娟鮮有幕前演出及公開活動，不過頻頻現身慧妍雅集活動，包括中秋義賣月餅、老人院探訪做義工。何艷娟亦保養得宜，經常於社交平台分享露腰裝束及長腿照派福。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！