黑色月光｜終極對決林夏薇演技再創高峰 獲網民推舉再封視后：楊怡個獎有危機了

由楊茜堯（前名楊怡）、王浩信、林夏薇、馬志威、黃翠如及楊卓娜等演員演出嘅TVB台慶劇《黑色月光》播出以嚟，無論劇情定演員演技都廣獲好評，令一班觀眾睇得非常肉緊。劇集喺噚晚（3日）播出大結局，想知網民們睇完有咩感受，快啲轆落去睇下啦！

噚晚劇情講到阿Moon（楊茜堯飾）為咗幫細妹曦晨（黃翠如飾）洗脫謀殺罪名，深入調查鄺永源（馬貫東飾）被殺案嘅關鍵證據。余漫星（楊卓娜飾）搵到一條卓慧雲（林夏薇飾）前往案發現場嘅片段，不過卓慧雲就聲稱自己當時喺屋企。成風（王浩信飾）提議由主席卓慧雲成為明天都會嘅代言人，並提議動用私人資金去支持Carsoli妹妹打贏官司，不過其實呢個只係一個圈套，令卓慧雲陷入財務危機。卓慧雲與成風等人一齊去電視台拍攝宣傳片，期間睇電視見到中東關係緊張，導致中東聯合基金下跌，於是成風提議將錢轉去瑞士帳戶。之後卓慧雲再去採排時，阿Moon突然現身，同佢嚟一場面對面嘅對決，阿Moon即指卓慧雲嘅罪行，仲講出佢嘅報復計劃。卓慧雲失去名牌王國、所有財產一𣊬間消失、王卓股價大跌及涉嫌謀殺被捕，最終佢被捕並被關進精精神病院。

林夏薇被推舉再做視后
兩大女主角嘅15分鐘終極對決，可以話係結局嘅重點！飾演「大反派」卓慧雲嘅林夏薇可以話係由頭帶到尾，盡顯視后功架。當楊茜堯出現講出嘅報復計劃細節時，佢嘅演技細膩又有層次，由雙眼通紅及眼泛淚光，去到情緒大爆發。唔少網民睇完都紛紛留言大讚佢演技再創高峰，並推舉佢再封視后，例如「薇姨呢場值得攞獎」、「林夏薇結局演技令人驚嘆萬分! 今年最佳女主角應是她!」、「楊怡個獎有危機了，愈後愈被薇薇搶哂」、「卓慧雲應該係薇薇代表作」、「Wow林夏薇真心掂啊，睇好佢再攞視后。其實我覺得佢之前七公主攞視后有啲尷尷哋，但今次真心值得攞視后」、「林夏薇演技已經爐火純青，超凡入聖」、「真心今次林夏薇做得好好」、「林夏微拎硬」及「這集衹睇林夏薇一個夠，非常精彩」等等。

「復仇大龍鳳」戲碼似《賭俠1999》
為咗呢個復仇計劃，阿Moon可以話係不惜工本。除咗動用多人幫手及搵Carsoli做衫自製血衣等之外，佢仲喺手機信號做手腳，令卓慧雲睇到假新聞報道。不過呢一個計劃被被網民指好似《賭俠1999》張家輝喺電台直播假球賽一幕，留言話「王晶賭俠1999系列」、「賭俠1999扮朗拿度條橋？」及「咁似王晶嗰啲賭神片 最後整段假踢波假新聞」等等。

向《與敵同行》致敬?
卓慧雲最終被關進精精神病院，不過喺最後鏡頭卓慧雲突然好正經咁問醫生幾時可以出院，最後仲以一個凌厲嘅眼神，作為劇集嘅終結，唔少網民都指為續集鋪路，更有網民覺得林夏薇嘅眼神疑似向《與敵同行》致敬，留言話「下輯到佢報仇」、「第二季搵唐立言」及「續集又出黎報仇？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！