2024娛樂大事回顧｜郭晉安歐倩怡離婚最為震驚 鄭中基突炒經理人兼暫時休息
即將踏入2025年，回望過往一年，娛樂圈出現唔少話題人物，當中有男女神嘅緋聞，又有結婚多年嘅藝人離婚，甚至上《東張西望》之後升級成全城注嘅對象，即同你一齊回顧2024娛樂大事！
2024娛樂大事回顧1. 李龍基女友王青霞涉逾期拘留被扣查
李龍基小36歲未婚妻王青霞被指一心呃李龍基錢，於1月份又被指假學歷、借錢後失蹤、買淘寶畫加工作假等等，獲李龍基向媒體作出公開澄清，指從來無將物業業權轉畀王青霞。王青霞於2月份涉逾期居留、使用虛假文書等6項控罪被檢控，並於大欖女懲教所還押看管，最終被裁定5項罪成，共判監25個月，李龍基每日到訪探望，更曾公開爆喊。
2024娛樂大事回顧2. 何生何太上《東張》由求助者變娛樂事
何伯與新何太因接受《東張西望》訪問，哭訴仔女攞走450萬而一夜成名，成為新聞人物，更有網民為佢哋於社交平台開設「何伯&新何太關注組」，以及阮兆祥、李思捷於《福祿壽訓練學院》模仿「鵝伯」、「鵝太」。新何太不時直播，起初與何伯感覺甜蜜，但之後間中於直播期間鬧何伯，曾經試過不滿敗露行蹤，狂鬧何伯半小時，當中一句「你出街瞓」爆紅。
2024娛樂大事回顧3. MIRROR成員Frankie女朋友是非不斷
MIRROR成員陳瑞輝（Frankie）6月公開認愛圈外女友Christy，掀起一連串風波，女方被連環爆出多單醜聞，包括多次做第三者，不但於Frankie與前女友Hei拍拖期間介入，又指佢周旋於Frankie和江𤒹生(AK) 之間，最終選擇Frankie。直至Frankie開腔回應，否認出軌同時為女友護航，指自己係喺上一段感結束後，先正式開始與Christy嘅關係。
2024娛樂大事回顧4. 《呃錢》受害人「Babyface」搵真愛被騙
「Babyface」黃先生於TVB綜藝節目《呃錢》講出一句「Baby face，點會無市場？」惹起熱議，又與林作拍片，公開向訪問佢嘅東張女神梁敏巧（Maggie）示愛，直言要喺30日內追到對方；不過，梁敏巧不為所動，表明唔會接受對方。事後，Babyface轉攻新目標薛影儀（阿儀），二人於髮廊會面，Babyface直接問阿儀，如果佢做男朋友如何，可惜阿儀直接拒絕。不過，近日林作安排Babyface和阿儀燭光晚餐。
2024娛樂大事回顧5. 龍婷與已婚演唱會製作人丘亞葵Hello Kiss
龍婷2022年參加《中年好聲音》而出道，7月時傳出與資深演唱會製作人兼有婦之夫丘亞葵疑撻著，被影到女方摸男方Pat Pat，又喺車廂咀咀。事後，龍婷透過TVB Music Group回應事件，指與丘亞葵為多年好友，二人之間純屬友誼；丘亞葵又解釋指係角度問題，感覺唔到龍婷拍佢，而咀咀只係朋友式Hello Kiss。一向有「樂壇風紀」之稱嘅甄妮亦曾於社交平台亦幽默地引用丘亞葵嘅「Hello Kiss」金句。
2024娛樂大事回顧6. 《破·地獄》膺香港華語電影最高票房冠軍
《破·地獄》由黃子華、許冠文、衛詩雅、朱栢康、周家怡演出，以殯儀館、生死教育作題材，除咗題材罕見，被激讚製作認真，包括詳盡資料搜集、殯儀、先人化妝等情節。電影於11月9日上映，當時僅上映5日，就衝破3000萬元票房，成為本年度香港電影開畫票房冠軍；直至12月7日，電影票房衝破1.22億，成為香港影史上華語片最高票房第1位。
2024娛樂大事回顧7. 黃家駒墳墓被毀
Beyond樂隊主音黃家駒於1993年應邀到日本富士電視台拍攝遊戲節目意外墜落三米高嘅台下，頭部朝下摔落，昏迷6日後於6月30日逝世。其墳墓於今年5月被YouTuber「光頭Bob」及一名姓葉男子用鐵錘刑毀及淋潑汽水，二人被控一項刑事毀壞罪，分別被判入更生中心及勞教中心。
2024娛樂大事回顧8. 鄭中基突炒經理人兼去赴美參加戒酒療程
鄭中基（Ronald）於8月初社交平台宣布，發現經理人何慶湘（湘姐）工作及道德操守有問題而終止合作，及後又發聲明指何慶湘已正式離職，而自己則因個人情緒健康問題，自爆有抑鬱和酗酒問題，將於完成演唱會後暫時休息至另行通知，並由太太陪同到美國參加戒酒中心嘅療程。佢又於YouTube頻道「機動電視台RTV」交代Channel暫時由其他同事營運，但叫大家放心，直言自己之後會再返嚟。
2024娛樂大事回顧9. 林明禎、Edan@MIRROR疑譜「明登戀」
被譽為「大馬女神」林明禎與MIRROR成員呂爵安（Edan）今年7月被網民野生捕獲於歐洲撐枱腳，加上Edan打扮極休閒，因而傳出戀情。不過二人皆否認戀情，Edan於9月份以「了解中」形容二人關係，及後又指自己正追求對方，而11月份二人又被拍到一齊到台灣行夜市，男方更搭女方膊頭；惟二人強調仍未發展成情侶。
2024娛樂大事回顧10. 郭晉安歐倩怡宣布離婚
郭晉安與歐倩怡結婚2006年結婚，結束7年愛情長跑，一直被認為是模範夫妻，惟今年5月二人於無預警下宣布結束18年婚姻，一對仔女郭令山及郭以雅與爸爸郭晉安同住。歐倩怡離婚後於網上節目自爆多年前，曾遇到發燒、呼吸困難及失禁情況，但身邊人懶理佢又無叫白車，引致佢攬住痰罐暈咗，直至起身時頭仍塞喺痰罐中。對於「痰罐事件」一事，郭晉安回應指因為係套房關係，房間唔會有痰罐，又指分開咗各有各嘅生活，好難控制人哋講咩。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
