70歲李國麟試食牛癟火鍋博到盡 曾一度作嘔卻力讚好味 網民：聞都頂唔順啦仲擺入口

70歲李國麟近年主力於內地發展，參與商演以外，更會直播帶貨，試過喪食小龍蝦、賣衛生巾及安全褲，又曾因連續直播帶貨8小時無人落單而被封「最慘帶貨明星」。李國麟雖然有「隱形富豪」之稱，住喺西貢複式豪宅，更揸名車Benz，但需年供幾十萬讓女兒到英國讀戲劇，因而努力賺錢，曾到訪江西省宜春市溫湯鎮時於鏡頭前直接飲用溫泉水嘅行為惹起熱議，網民指李國麟博盡全力，認為佢搵嘅真係辛苦錢。近日，李國麟於貴州品嚐當地暗黑料理牛癟火鍋，又再引起討論。

李國麟於社交平台分享一條於貴州品嚐當地牛癟火鍋嘅影片，寫道：「牛癟火鍋你們吃過嗎？來到冬日的貴陽，挑戰一下很多人不敢嘗試的特色美食」，從影片中看到，李國麟由朋友帶路，以為去食牛肉火鍋，結果到達餐廳後見到個湯係綠色；李國麟聞咗一下即時掩住口鼻詢問朋友湯底係咪壞咗，朋友則解釋：「沒有這湯怪怪的，但是吃起來很香」。於是，李國麟用紙巾塞住鼻孔，每食一啖火鍋就會將鼻孔內嘅紙巾抽走，並大讚好食。不過，當聽到朋友表示牛癟火鍋以牛胃與牛小腸中未完全消化嘅草料為食材，李國麟即時擺出噁心表情，更一度作嘔。牛癟火鍋又有「牛屎火鍋」和「牛糞火鍋」之稱，因為於廣西部份地區嘅方言中，「癟」解作「糞」；網民對於李國麟食牛癟火鍋，留言表示：「食牛未消化完既野…」、「好爸爸，幾廿歲為左幫下一代賺多個錢連屎都敢放入口」、「開呢啲帶貨係咪真係咁好搵，玩到連屎都肯食」、「即係不斷滾住啲嘔吐物，聞都頂唔順啦仲擺入口」、「辛苦錢」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！