MIRROR小組歌曲第三回 楊樂文、江𤒹生、王智德、陳瑞輝揈走負能量保持有型真我 為新歌《FING!》學跳electro dance

MIRROR小組歌來到第三回 — 四位成員楊樂文Lokman、江𤒹生AK、王智德Alton及陳瑞輝Frankie選擇以跳唱作品〈FING!〉跟大家見面，跳舞多年的四子更首度挑戰在香港甚少見的electro dance，甚有新鮮感，歌曲風格亦是MIRROR前所未有的全新嘗試。

歌名〈FING!〉不僅是一個動作，更是食過夜粥嘅「夜粥小組」想傳遞的訊息。AK介紹道：「希望大家揈走一啲不必要嘅負能量，又或者唔關自己事但又擺喺自己身上嘅嘢，譬如有啲人放負純粹抒發一下，但自己又會吸咗，所以一啲唔關自己事嘅嘢，揈開晒先，focus返喺自己度，做好自己嘅嘢。」一聽見「FING（揈）」這個字，大家或者會想到過程很論盡，但AK續道：「我哋都講求揈嘅時候要keep返最真實嘅自己，維持最鍾意做嘅嘢，仲要keep返自己最有型嘅狀態。」

新歌由王雙駿（Carl叔叔）包辦作曲、編曲和監製，Carl叔亦表示這次是收到四子想跳的舞蹈風格影片後度身訂造出〈FING!〉，是以舞蹈為主軸的一次創作；歌詞部分除了有Oscar填詞，Lokman及Alton亦親自為填寫Rap詞！，Lokman道：「我嗰段係有趣啲但冇乜內容，不斷重覆幾句句子，玩下排序，當中用咗『揈』字好多次，點解呢？因為我哋係先諗咗用electro dance呢個舞種先，呢種舞嘅特色就係隻手係度亂咁揈，揈一啲好神奇嘅pattern、路線同節奏出嚟，我就用呢種舞種嘅感覺去做開頭，希望我用無厘頭搞笑嘅方式去令大家點樣閱讀呢首歌。」至於Alton部份，他介紹道：「我就寫返世界嘅生存之道。世界愈見複雜嘅時候，我哋點樣揈走同自己無關、無益嘅嘢，搵返自己核心價值，搵返自己開心泉源，搵返屬於自己嘅處世之道。講到好偉大，但最後就睇下大家聽到啲乜喇！」

說回Lokman前面所提及的electro dance，今次〈FING!〉的舞步除了hip hop及wrecking外，亦會嘗試electro dance，這全因Lokman想玩新花臣！他說：「細個睇過一種舞叫electro dance，睇完好深刻，到我哋有小組歌嘅時候，突然醒起呢個舞種，於是問過三位兄弟都OK，然後問咗一個喺西班牙好多年嘅跳舞朋友，因為呢個舞種都係歐洲發起，佢有學過少少，然後咁啱佢又返香港，就順利成章搵佢幫我哋排舞。」Electro dance 4個人都未曾學過，Frankie坦言很開心可以一齊作出新嘗試，他道：「呢次舞蹈好玩，學到新舞步，我哋4個好似好耐冇跳過舞，終於學到新嘢好開心，大家拍MV前都不停喺度練。」雖然要在拍攝前苦練，但Frankie直言好玩多過辛苦，他說：「〈FING!〉係3隻小組歌入面跳得最多嘅一首，但拍MV又唔覺辛苦，因為大家好有默契，一齊跳開，vibe好舒服，同埋首歌好玩，4個當玩咗去就可以。」不過由於MV中另有劇情要交代，而electro dance的手部動作較多，當中亦有很多連繫，在MV裡就未必會睇到很多細節，若要欣賞Lokman、AK、Alton與Frankie如何跳出默契，就要留意他們日後的Live演出了。

另外值得留意的是今次〈FING!〉MV內的另一個小細節，AK透露：「大家細心留意MV會有一個QR code，其實會連去一個number，嗰個number會帶你去一個群組/頻道入面，裡面就會睇到〈FING!〉呢首歌嘅所有資訊，所以大家要留意喇！」