亞洲小姐2024︳陳美濤第3次參選終奪冠 30萬獎金「全部捐俾下屆營運」 泳裝環節有佳麗著孖煙囪示人

亞視永恆，亞姐當然不死。《第35屆 亞洲小姐競選全球大賽（香港賽區）總決賽》尋晚圓滿結束，擁有港大中國歷史系博士超高學歷嘅3號陳美濤奪冠。陳美濤個號碼同佢參加亞姐次數一樣，係3。陳美濤參加過2020及2021年亞姐但兩度落敗，今年29歲幾嘅Tomato（陳洋名）話係當參加夏令營（而家冬天啦喎），本來有心理準備陪跑，結果跑出。

而亞軍就係賽前被傳媒認為有幾分似已故亞姐陳寶蓮嘅張文婧，而季軍黃艷就曾經參加今年港姐而試，最後退選。

亞姐歷年都好有娛樂性，今年入圍佳麗玉照曝光後更有唔少巴打話禾稈冚珍珠；賽前就爆出大熱佳麗許詠詩退出，許聲稱因為亞姐嘅時間表唔穩定，更向傳媒踢爆「有啲人casting冇出現過」。至於亞姐決賽一樣好有睇頭，例如泳裝環節中，11 號張玉潔 Yuki上身係著比堅尼，但下身並唔係三角型泳褲，而係類似「孖煙囪」嘅短褲……可能有需要啦。而三甲得獎後獲佩帶嘅綵帶，字體同內地政府機關橫額所用嘅相當類似，grand囉。

本屆亞姐宣傳時話冠軍可以獲得30萬獎金，得到冠軍嘅陳美濤被問到點用呢筆獎金，佢就話會一如台上問答環節時所言，全部捐俾下屆營運！吓？咪即係得個桔？而亞軍張文婧就話想將獎金作慈善用途，季軍黃艷以國語回答話打算捐俾母校香港大學。

大會宣傳時聲稱冠亞季軍分別可獲30萬、20萬及10萬獎金，但後來拎走呢一點，而退出嘅許詠詩受訪時提到佢有向大會了解，但未有回覆。亞視之後回覆傳媒就話「沒有改變」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！