太子美食│表兄弟轉行賣台式古早蛋糕!必食手工花生酥+金菠蘿手工蛋糕
其衝。箇中業者,動彈不得,與其坐食山崩,不如想辦法自救。於是,有人炒散、有人轉行、有人孤注一擲,自己做老闆,創業殺出血路來。太子一家古早蛋糕店,就有兩表兄弟,眼見本業難為,決定扭軚,創業賣蛋糕,破釡沉舟搏一舖。憑幾招絕活、靠一股拼勁,殺出血路一條。
【立即讚好】全新 Yahoo Food Facebook 專頁
店舖超小 五臟俱全
炎夏下午,太子界限街近大埔道,烈日像火燒。一家賣台式古早蛋糕的小店,店面小得可以,只有幾十呎,只許一人容身。店家都在門外招徠,見人路過,落力宣傳。「我哋有台式古早蛋糕、鳳梨酥、花生酥,有興趣可以試試喎。」
兩個年輕的老闆,都是男的,禮貌周周的招徠,只是路人太匆匆,停下的少,懶理的多。偶有停下看看的,他們就把握機會,加多幾錢肉緊介紹。「我哋有十八款口味嘅古早蛋糕,好似呢款金菠蘿手工蛋糕,用咗土鳳梨、麻糬及新鮮菠蘿做,酸酸甜甜、煙煙韌韌,全部都係新鮮出爐,好好食架!」
語音未落,店面的布簾掀開,內裡是個小工場,四個餅師,擠在一起,正忙著把剛焗好的古早蛋糕送到店面,客人瞥見,信心大增,不少都買一兩件回去。
「我哋間舖好細,成間店得120呎,工場佔咗三分二,入面有四個人做嘢,連埋我哋兩個,總共六個人。」年輕的老闆說。
他叫Chris,33歲,與表哥阿Tim,並表嫂和幾個女餅師打理這家小小的店舖。表兄弟拍檔,負責營銷及推廣。餅房的工作,由表嫂統領三位好姊妹來完成,正宗「男主外、女主內」的格局。「我哋呢度行部長制,分營業部同製作部,各司其職,分開問責,好似樓面和廚房的關係。」表哥阿Tim說。
用料精良 新鮮現製
製作部四個女將,早上八點就開工做蛋糕,十點半開賣,營業部就負責在門外招徠,蛋糕每天最少做八款,一直做到黃昏六點,之後開始做酥,花生酥、鳳梨酥,輪流出爐,一直做到收工為止。「古早蛋糕早輪大熱呀!淨係我哋呢頭都有幾間,不過唔好以為易做呀,啱啱有一間執笠,亦有人減半價,好難做。」表哥Tim說。
他們店的位置不佳,開業一年,能夠生存,靠的是口碑。口碑不外這些:款式多、材料靚、手工好、新鮮做。光是古早蛋糕,就有十八款。原味、原味合桃、伯爵茶、金菠蘿、香酥肉鬆、雙層芝士、特濃芝士、Oreo朱古力、合桃咖啡、士多啤梨、養生芝麻、焦糖奶茶、海鹽布朗尼……酥類又有鳳梨酥、花生酥、南棗酥、四喜酥、麻薯芋頭酥、蛋黃芋頭酥、紅豆蛋黃酥……幾心多的香港人,都會揀到合心水的。
用料也講究,日本麵粉、黑白奶、新紀元卵。川寧伯爵茶……麻糬用高雄老店取,鳳梨用台灣八卦山土鳳梨,和微熱山丘一樣。「成本高呀!好似麻糬咁,貴過人架,但係軟熟濕糯,煙韌不乾,貴啲我都寧願用佢,我哋呢度靠口碑,呢啲唔慳得。」表哥Tim說。
疫情肆虐 創業自救
別看阿Tim今天經營得頭頭是道,年多前,他還不過是個門外漢。他本不是幹烘焙的,他在墨爾本讀IT,上過大陸做褲廠。後來從事寶石行業,經常要飛去巴西搜購礦石。「我一飛就一個月至返,唔單止入貨,直情要入去山度鐅礦石㗎。疫情前生意好好,完全冇諗過會轉行。」Tim說。想做的烘焙的,其實是Tim嫂。她一向喜歡做酥做餅做蛋糕,三年前,Tim的朋友的阿嫲在台灣做蛋糕,他倆就飛去請教她,學識古早蛋糕的做法。2020年2月左右,Tim嫂決定開店,找來幾個愛烘焙的好姊妹幫手。Tim本來繼續自己的寶石生意,誰料香港封關,一夜之間沒法再飛,寶石生意被迫中斷。
「恰巧太太店開張,我橫掂冇嘢做,就不如過來幫手囉,點知一幫幫到今日啫。」Tim說。陰差陽錯、世事難料的,還有表弟Chris。年多前,他也沒想過會在這裡幫手的,他做了11年導遊,星馬泰日韓越中台都去過,後來遠征歐洲,希臘、土耳其,烏克蘭、白俄羅斯、冰島……西歐各國都有他的足跡,連伊朗等中東國家都帶過團去過,是隻沒有腳的雀仔。「我好鍾意做導遊架,見識多囉,鍾意做對人嘅工作。份工如果十分滿分,我至少俾八分㗎。」Chris說。
2020年3月,他帶了最後一團西班牙團,回來籌備帶下一團土耳其和希臘,誰料忽然封關,旅行團全部嗌停。「公司話停薪留職,以為暑假後會開關,點知一路都冇,發覺唔對勁,公司就叫我哋搵兼職。」他說。他也只好放下身段,有工便做,連送外賣都做過,就只等待復職,可以再飛,但日過一日,月過一月,無了期等待,意志開始消沉。「咁啱表哥搵我合股,我諗住與其炒散,不如嚟幫下手囉。」Chris說。他做開導遊,個性外向,喜接觸人。站在街上招徠,誠懇親切,沒半點忸怩。「客人冷面?冇所謂啦,我以前都服務開客人啦。請下人試食,佢下次又嚟打招呼,都幾開心。」他說。
他協助銷售及做市場推廣,見客人幫襯,就送其他產品試食,少少花生酥,成為最重要宣傳。「成本過百蚊㗎,不過佢哋食過,覺得好食就會返轉頭。」免費試食,不單可作宣傳,也可以測試市場反應。「冇人問,就唔好嘥心機啦。有人返嚟問,就代表有得做,可以生產囉。」好像他們的絕活:鳳梨酥加麻糬,一般客人很受落,但也有客人反映老人家吃怕會啃親,他們就從善如流,推出多一款冇麻糬的鹹蛋黃版。「我哋推出嘅產品完全係由市場決定架。」
他也有市場觸覺,農曆新年,他就出福袋,給人好送禮。又把鳳梨酥做成元寶形,買的人開心,收的人歡喜。「農曆新年、中秋做足十八小時,凌晨兩點才收工,好好生意呀。」生意好,有滿足感,表弟Chris也由去年年底開始由兼職轉做全職。至於表哥Tim,卻又有另一些收獲。「最大收獲咪個女囉,個女十歲,我以前去巴西,佢見到我拎行李就喊。而家多咗時間陪佢,也多了時間陪太太,乜嘢都值得啦。」Tim甜甜的說。「咁開關仲飛唔飛?仲做唔番老本行?」「講真,當初咁飛都係為搵食啫,飛到五十歲唔通仲飛咩,雀仔係時候降落啦。」Tim說。都說,上帝關了一度門,會給你另開一扇窗。天無絕人之路,沉著氣,拐個彎,也許驚喜就在面前。
全新訂座平台「Yahoo訂餐廳×Openrice」正式上線!
阿嫲現烤手工蛋糕
地址:太子砵蘭街456號地下B號舖(地圖按此)
電話:70734988
更多太子美食推介
太子包販子結業!人氣麵包漢堡店 咕嚕炸雞包+花生味雪糕西多賣到7月底!
太子美食|雲吞麵關注組熱捧十大碗粥麵專家 即睇雲吞麵以外仲有咩好食!
【太子美食】時裝設計師開日系車仔麵店 $55十餸麵 麵條都有14款
【太子美食】太子高質Café推介5間:食Brunch打卡嘆咖啡
【今晚食乜好】唔知今晚食乜餸?立即去Yahoo Food 食譜專頁搵靈感
>>按此下載<< 全新Yahoo APP,領取最新餐廳優惠、氣炸食譜、自助餐推介、仲有飲食達人教你識煮識食,讓你成為真正全面的吃貨,立即下載!
文、攝:譚偉健