愛回家｜「書蟲」林浩文宣布離巢TVB 入行7年半曾揸的士幫補生活
TVB處境劇《愛·回家之開心速遞》近年相繼有演員因離巢TVB而離開劇組，最新宣布離開TVB嘅藝人為「書蟲」林浩文。林浩文日前於社交平台撰寫長文，宣布離巢效力7年半嘅TVB：「再見TVB，再見我嘅貴人們，我哋江湖見。」
林浩文於帖文中用「小朋友」形容自己，表示17歲嗰年迎來第一次喺TVB表演嘅機會，之後2008年喺TVB節目中曾為郭富城伴舞，2017年報讀藝員訓練班從而由舞蹈員變成演員：「不知不覺又已經過左7年半了，呢7年半亦有好多貴人幫助同比機會呢位小朋友，而呢位小朋友亦衷心感激曾經幫助過佢嘅人，雖然佢好少掛係口邊，但佢默默記住曾經幫過佢嘅人。」又指，命運再一次要佢轉變：「去一個充滿❓嘅環境，佢唔知將來會好會壞…但經歷過嘅所有野都會放在心中，佢好希望有機會再同大家係一個更好嘅時光再相遇。」
林浩文以Dancer出身，15歲跳街舞，擅長HipHop，BreakDance、試當真及社交舞，喺2008年無綫節目中曾為郭富城伴舞，之後又於2017年入讀藝員訓練班。多年來，《愛•回家之開心速遞》「書蟲」一角係佢入行後較多人有印象嘅角色，不過2023年劇情講述大小姐（林淑敏飾）及熊心如（蘇韻姿飾）撤資退股「天才聯盟補習社」，一班補習社員工申瑞素（古佩玲飾）、Candy（葉蒨文飾）、面油（羅永健飾）和書蟲（林浩文飾）紛紛面臨失業。林浩文藉呢段時間考咗個的士牌，又承認自己的確有兼職做的士司機，每朝早5點開工至下午5點放工，所以宜家好早瞓，清晨4點天未光就起身去攞車。林浩文亦曾與2014年香港小姐冠軍邵珮詩拍拖，不過因為邵珮詩出身富裕，林浩文則出身於公屋，因此二人嘅戀情一直不被看好，2022年結束4年情，當時林浩文被指「食軟飯」，但邵珮詩就發文表示二人分手係經過深思熟慮，會繼續互相支持對方。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
