鄧兆尊直認同三位女友冇親密接觸 女友有需要就事先「入紙申請」

於加拿大定居嘅李婉華近日回港，約咗唔少好友食飯聚頭，其中一餐約咗娛樂KOL潘小文同埋鄧兆尊，仲一齊開直播。

有傳身家億億聲嘅鄧兆尊近年都以嘉賓主持現身網上娛樂talk show，網民盛讚兆尊有料爆又夠膽講。今次兆尊就自爆同三位女友嘅相處秘聞。外界以為鄧兆尊盡享齊人之福，但係兆尊直認同女友們好耐冇「親密接觸」，「唔好呢尾嘢」。婉華追問女友有需要點算，兆尊抵死咁話「入紙申請囉，等我儲定啲能量同你開戰」。咁點儲能量呢？兆尊話係靠踢波。

身為明星足球隊一員，鄧兆尊不時喺周末外出比賽，李婉華同潘小文都想知佢踢完比賽會唔會有「課外活動」，兆尊就話最多都係周圍行下同埋去按摩，仲強調按摩場所有小朋友出入，好健康。

李婉華好奇想知57歲嘅兆尊有冇進補，兆尊笑言「只有蠢嘅男人先補」，因為補完又係益女伴。而家鄧兆尊對年輕女性有一番睇法，認為18至30歲嘅女性唔係唔靚，不過煩，但係佢都話自己係「不正常男人嘅睇法」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！