奪命提示｜童星「子瑜」鍾嘉佑喊戲令網民激驚喜 大讚前途無限 平日愛跳舞和朗誦動靜皆宜

TVB劇集《奪命提示》正熱播，演員陣容包括陳山聰、張振朗、劉佩玥、劉穎鏇、丁子朗、郭柏妍及林子善等等，除咗劉穎鏇「最強Body」引起話題，一班童星嘅演出亦獲關注；日前播出嘅單元—童夢之家院舍小孩接連失蹤，童星鍾嘉佑憑喊戲獲得網民一致好評。

鍾嘉佑於劇中飾演俊朗（張振朗飾）契女子瑜，前晚（24日）播出一集，講述鍾嘉佑喺真兇井亦希（鄧智堅飾）車上意外發現鄧智堅嘅殺人罪證，令鄧智堅頓起殺機，鍾嘉佑演繹出驚訝及害怕嘅情緒，被鄧智堅追跑期間嘅喊戲更加令網民大感驚喜，激讚佢前途無限，又指鍾嘉佑可以同楊卓娜爭最佳女配角。

鍾嘉佑現時13歲，拍攝《奪命提示》時僅得11歲。鍾嘉佑過往曾替兒童節目《Hands Up》和《Think Big天地》擔任小主持，又曾拍攝劇集《隱門》，當時爆喊場口亦成功彈出，不但被同劇演員吳岱融及黃智雯大讚，更被喻為下一個唐寧和黃美棋。鍾嘉佑嘅社交平台由媽媽管理，不時分享跳舞影片，相當活潑；日前亦參加第75屆學校朗誦節比賽，分別於英文項目勇奪亞軍，普通話項目奪得優異獎，可見鍾嘉佑動靜皆宜。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！