《白雪公主》新版票房仆直 影評網分數跌到得1.7分 Rachel Zegler犯眾憎搞到神奇女俠接死亡恐嚇︳電影LOL
迪士尼宣布開拍真人版《白雪公主》之後，大家都等睇戲 － 唔係《白》套戲，而係同呢套戲相關嘅新聞。搵相貌唔多公主嘅新貴Rachel Zegler做女主角，反而「神奇女俠」靚媽Gal Gadot做惡毒母后。Rachel Zegler接演角色後，曾經喺訪問度話強調新版本嘅白雪公主唔會再要王子打救，唔會戀愛大過天，而且認為嗰個男人（王子呀即係）跟蹤白雪公主好怪囉。曾經係動畫師、亦係1937年版《白雪公主》卡通電影版導演個仔David Hand，即使年屆91歲都相當好火，認為Rachel口中嘅新版《白雪公主》根本係另一個故仔，佢完全唔buy，更直言「咁樣搞啲經典戲，對迪士尼先生同家父都幾侮辱……我估佢2位知道的話，會喺棺材彈起身都似！」。
好嘞正片《白雪公主》終於上畫，首周全球票房有8700萬美元，算係低收。畢竟迪士尼大片喎，成本2億5千萬美元，即係至少要5億樓上先叫賺。開畫唔過1億，除非口碑好好有翻頭客，否則只會見到埋單條數應該冇幾多反彈空間。而家美國特朗普當政，社會風氣同以前好唔同，早幾年嘅Woke(覺醒文化）思潮靜晒，於是唔少人都歸咎《白雪公主》係咪go woke go broke。有外媒訪問業界人士，佢就認為《白雪公主》票房仆唔關外在環境因素，而係……套戲真係被唔少影評人劣評。有影評認為新版《白雪公主》空洞、唔夠可愛同冇深度。
專業影評之外，新版《白雪公主》喺外國電影資訊網IMDB嘅評分日日跌，10分滿分只得1.7分，當然唔能夠排除有人故意負評，但係日日睇住個評分咁跌，好似好睇過電影本身。
女主角Rachel Zegler嘅搶口可能都係電影仆直原因，畢竟佢試過喺IG爆粗鬧特朗普。《紐約郵報》今日嘅報導指，有傳迪士尼為免Rachel又再出post _up，曾經派人審查佢個IG帳戶，直到電影上畫為止。同一篇報導又話，Rachel似乎低估自己言論嘅「殺傷力」，而同片嘅Gal Gadot因為收到死亡恐嚇，呢期需要搵保鏢跟身。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
