胡定欣醫生男友師弟出PO大讚人品好 結尾惹熱議：你係當事人邊位？

現年43歲嘅兩屆視后胡定欣，自2016年與音樂人陳明道分開後便一直單身。單身8年嘅佢喺上年承認脫單，不過就未有公開男友身份。直至上月，佢藉住元宵佳節罕有公佈戀情，喺社交網站公開與圈外醫生男友去滑雪嘅合照，得到好友及唔少網民祝福。

胡定欣男友係外科專科醫生陳健華（Akin），係公認嘅鑽石級筍盤。身高6呎留有鬍鬚嘅佢出身草根階層，爸爸從事地盤及裝修，而媽媽就做過小販，佢喺中學時期就已經萌生行醫嘅志向。佢畢業於香港中文大學內外全科及英國愛丁堡皇家外科醫學院，仲喺2012年開始加入無國界醫生，曾前往巴基斯坦、南蘇丹當地參與前線救援工作，好多時佢都係醫院唯一一個外科醫生，須24小時on call直至到離開救援服務嗰一日。佢由公立醫院工作轉到尖沙咀一間診所執業，參與援工作時零收入兼白交租亦無悔。

近日有位自稱係陳醫生中大醫學院師弟嘅網民王先生，喺Threads出PO大讚師兄，同時暗指胡定欣襯唔起陳醫生：「我是CU MED2005，這位師兄是CU MED2004，即是醫學院的師兄。我只可以說，他除了能力非常強大外，那種犧牲精神異於常人，前前後後做過7次無國界醫生，做無國界醫生的每次任務時間：最短2月，最長2年，而工作地方不是我國的上海、日本的東京、美國的紐約，而是非洲的蘇丹、亞洲的敘利亞、美洲的海地這些意想不到的貧窮國度，不過我不知道胡定欣怎樣盛載這位醫學院師兄。」

呢個PO一出，唔少網民力撐胡定欣及直斥發文者唔識尊重人：「睇你個名就知你邊度落嚟 學歷高唔代表人品好 你係一個好好嘅例子 」、「好無品同零尊。讀醫喎。就算你覺得人地女朋友襯唔起，好熟嘅朋友都唔需要咁樣judge人再同當事人講。何況你仲公開出post。想讚師兄唔駛拉人地戀情嚟講。你係當事人邊位？ 不如你又拎你另一半出嚟大家judge完公開踩吓好唔好？ 」、「其實胡定欣經常都有義務幫慈善機構宣傳，仲去過埃塞俄比亞探訪當地項目。唔建議憑少少印象就judge人哋可唔可以『盛載』。」及「我原本仲以為你稱讚緊呢位師兄，睇到最後唔知道胡定欣點樣『盛載』就真係好唔get。我寧願相信你係想間接宣傳自己畢業於中大05 medic。」等等。

另外，亦有曾與陳醫生共事嘅護士留言大讚陳醫生嘅人品：「作為醫院裡面既最最最低級職員- HCA，同佢共事左六七年，佢真係好有禮貌，無論對同輩後輩下屬醫生護士都好好。對病人好有heart。（每次拍住佢工作都會好高興）好少有既醫生🫶🏻如果每個醫生都可以好似佢咁就好。出於污泥而不染。PS 做完醫院之後我發誓乞食都唔返去，實在太多人渣。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！