吳毅將經歷大動脈血管撕裂手術有癱瘓風險 曾囑咐老婆必要時唔搶救「生人好過啲」

今年63歲嘅吳毅將，曾先後效力亞視及無線，以其粗獷猛男形象為人認識。吳毅將更曾經拍攝三級片，同王喜有場「的士激戰」，一度成為話題。

近年主力喺內地發展嘅吳毅將日前接受鍾慧冰嘅YouTube節目訪問，透露數年前曾出現大動脈血管撕裂。吳毅將指因為腹部不適求醫，起初診斷結果係腸胃問題，點知同一晚醫生再致電話係大動脈血管撕裂，要即時入院。吳毅將提，自己條大動脈出現血管增生，影響腎臟血液供應，而原因可能同年青時做gym太進取、拍戲日夜顛倒、煙酒過多等有關。

吳毅將憶述醫生話如果做搭橋手術會有三成機會癱瘓甚至死亡，令佢因為手術風險一度糾結要唔要做，更加向老婆唐麗球囑咐，若果變癱就唔好搶救。「我不如走喇！生人都好過啲，傷心吓就算。癱呢？佢一世都要陪住我，都唔知服侍到幾時？大家辛苦。」好在最後手術成功，而家只係要食降血壓藥，同時要改變飲食習慣，即使演戲都唔可以太激動。

原來吳毅將本身性格火爆，喺節目中承認多年前揸車時喺隧道被後車「閃燈」叫佢揸快啲，佢竟然突然煞停架車仲落車同對方嘈交；但係而家吳毅將已經收火不少，有時同人「霎氣」之後會親自向對方道歉。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！