歡樂滿東華2024︱劉穎鏇羅浩銘拉巴士被質疑造假 親回應網民質疑 陳庭欣幫口澄清

劉穎鏇（Tiffany）近年因TVB劇集《隱形戰隊》飾演反恐特勤隊女隊員「邢風」一角深入民心，獲封為「性感打女」；日前（7日）劉穎鏇與動作演員羅浩銘（Ken）為《歡樂滿東華2024》拉巴士籌款，二人出盡力拉24座位小巴和雙層巴士，谷到面部通紅，最後共籌得80萬元善款。不過，卻因一細節惹網民質疑造假？

劉穎鏇與羅浩銘分別挑戰拉巴士，前者拉3.5公噸重24座小巴；後者則拉16公噸重雙層城巴。是次籌款項目由羅浩銘兼任項目動作指導，負責訓練埋劉穎鏇。羅浩銘表示劉穎鏇第一日接受訓練嗰陣多次嘗試拉動24座旅遊巴都唔成功，但仍不氣餒努力訓練。當晚，劉穎鏇只需將24座小巴拉動20米就可以籌得30萬，劉穎鏇雖然用盡全力，見到佢每行一步嘅表情都相當痛苦，最終僅拉到19米，不過其毅力感動一班善長，即使未達20米仍願意捐出30萬。羅浩銘於訓練時，則由24座旅遊巴、中型旅遊巴、雙層巴士按次序嘗試拉動，並按監製與導演提議，一邊拉車嘅同時一邊上乘客；最後，到正式表演時，羅浩銘成功拉動一輛載上16人嘅雙層巴士。

不過，有網民見到有人坐喺司機位，質疑劉穎鏇與羅浩銘造假：「做戲，司機會踩油，後面有人推」、「入面有司機，踩油的」、「真係唔好當觀眾傻啦，根本就係個司機開，特別係個巴士去到尾站已經穿崩啦」等等。對於網民質疑，羅浩銘親自回覆：「我們沒有造假」，又指有司機喺因為安全和保險關係：「多謝大家支持 司機坐係裡面係安全同保險問題，他沒有踩油門，車也沒有啟動，外國world strongest man基本上每年都有bus pull環節，我明白大家會有懷疑，但我們對得人 拜得神，是訓練出來的成果。」羅浩銘又分享彩排時沒有司機嘅片段。

當晚大會司儀之一嘅陳庭欣亦於社交平台PO出與劉穎鏇、羅浩銘合照，大讚劉穎鏇熱血，又替佢哋澄清：「排練以至演出當晚都係出盡全力嘅Tiffany 同羅師父實在唔應該收到一啲歪曲嘅評論，唔應該抹剎佢哋認真同努力，咁樣對佢哋真係好唔公平！或許，喺短短嘅節目入邊唔能夠詳細講解，引致大家會有唔明白嘅地方：車係喺熄匙嘅狀態 （無動力） 、車長坐喺司機位係因為安全嘅原因，萬一出狀況可以隨時將車輛剎停、車身及車後位置都無站立任何人。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！