聽麥翠嫺介紹買縮水鋪 百幾萬投資蝕剩12萬 苦主薛家燕憶述︰真係好慘

「前亞視一姐」麥翠嫺近年復出幕前，曾經喺《家族榮耀》一劇演楊茜堯媽咪，亦因此令到多年前佢被指介紹薛家燕投資商場「縮水鋪」而損失慘重一事出土。麥翠嫺早前受訪時公開向家燕姐合十道歉，並希望對方原諒，又自言佢都係受害者，唔見咗好多錢，亦牽連到朋友。

至於事件另一主角薛家燕，周末受訪時被問起「縮水鋪」一事，家燕姐話事情發生後曾經同麥翠嫺講「算啦！都放低咗，人生總要有一啲經驗嘅。」，又直言曾經喺公開場合同麥翠嫺同佢老公龔汝華碰面﹐場面有啲尷尬。

講返當年事發經過，薛家燕指90年代時剛剛辦離婚，因此希望努力搵錢照顧仔女。後來佢由麥翠嫺兩公婆得知投資商鋪賺錢，於是用盡積蓄加上向親友借錢買鋪。點知家燕姐後來發現入手嘅商鋪係縮水舖，而且建築上違規，完全冇人買，令家燕姐損失慘重，最後百幾萬嘅鋪位以12萬售出。家燕姐話當時每個月要供款2萬幾，令佢大受打撃，好在復出拍《真情》大受歡迎令佢豬籠入水，先至令家燕姐翻身。家燕姐亦寄語大家買樓前要搵律師諮詢

麥翠嫺受訪時話自己都係信錯發展商先令朋友都受牽連，而薛家燕日前受訪時話，當日買完鋪個幾月後搵過麥翠嫺兩公婆提到賣鋪情況，麥翠嫺老公同家燕姐講「冇人買就冇辦法」，仲話「買呢啲嘢就唔會話包生仔」。

麥翠嫺係1983年亞視第一屆藝訓班畢業生，同屆同學有黃秋生、苑瓊丹等。麥翠嫺出道後受亞視重用，後來轉投TVB，到九十年代中期嫁予從商嘅龔汝華。麥翠嫺同老公九七前後靠炒樓致富，麥因此被稱為「3億富婆」。2004年龔汝華被頒令破產，後來靠從事鐘錶生意東山再起，麥翠嫺都有幫手打理生意。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！