蔡少芬朱茵回歸TVB新劇《風華背後》有變數 檔期問題隨時告吹？
TVB近年都會有一兩套重頭合拍劇，方程式大致上係視后級女星加恩怨情仇戲碼，例如佘詩曼嘅 《新聞女王》、楊茜堯嘅《黑色月光》、《家族榮耀》，仲有宣萱主演、拍起未播嘅《巨塔之后》等。
早前有傳TVB已經搵咗另一位視后級女星蔡少芬Ada，同佢嘅好姊妹朱茵一齊回巢，接拍新劇《風華背後》。卡士除咗兩位女一級數演員外，甚至有傳有汪明荃、黃宗澤、姜大衛、譚俊彥等，陣容超重磅。
不過近日有消息指，基於《風華背後》嘅劇本完成進度等原因，開拍日期可能要改動，但係由於蔡少芬有其他工作在身，《風華背後》延期開工的話，隨時同Ada其他工作撞期，因此有可能告吹。而蔡少芬嘅經理人回應傳媒時就確認《風華背後》延遲開拍，而且未有肯定蔡少芬能否接拍，要視乎檔期同劇集開工日子先至落實。
根據TVB同內地合作平台已經製作嘅宣傳海報，上面未有寫明女主角等演員人選，而宣傳語句就寫道「姐妹是上天送給你一生的夥伴，也是上天送給你一生的敵人。」，估計該劇應該以姊妹恩怨為主線。暫時未有消息提到，一旦蔡少芬要辭演的話會有咩人選頂替，又或者Ada未能埋位的話劇集會否拍唔成。
蔡少芬1998年以《天地豪情》嘅演出贏得《萬千星輝頒獎典禮》最佳女主角大獎成為第2屆視后，並以25歲之齡封后成為最年輕視后，紀錄至今仍未被打破。2011年憑《甄嬛傳》在內地走紅後，蔡少芬只係喺2016年返TVB拍過劇集《老表，畢業喇！》。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
