試當真宣布10月停更YouTube Channel強調並非惡作劇 「未來半年作最後衝刺」

由游學修、許賢同蘇致豪創立嘅創作團隊「試當真」，喺今日愚人節宣布將於10月底、亦即成立5週年當日起停止運作，並強調「選擇在四月一日宣佈，也算是一種玩笑，但以下內容並非惡作劇」。

試當真喺社交平台嘅公告表示，停止運作YouTube Channel係經過多番考慮和認真討論。而喺停更前呢半年時間，試當真指「我們希望有始有終，在未來半年作最後衝刺，好好享受認真創作，歡迎廣告客戶作最後支持」。除咗每週試映劇場及電影製作進行中，亦會舉辦《試當真喜劇大短片比賽》以發掘新人為網絡創作出一分力。與此同時亦會開拍數集試玩毛，包括《墨魚遊戲2》，作為告別禮送給觀眾。試當真最後感謝支持者5年來一起試過認真，認真試過。

由於今日唔少網上惡作劇，有網民以為試當真玩嘢，留言話「出完post好出片喇．。同時亦有心水清網民指「過咗十二點，似認真」。試當真於2020年10月18日起開始營運，除咗3位創辦人之外，核心成員仲包括林家熙(Locker）、岑珈其、陳苡臻（Jessica）、倪安慈及陳穎欣（Yanny）等。除咗網上短片之外，試當真仲舉辦過舞台演出、大型game show、《校花校草選舉》等，亦拍攝關於DSE文憑試嘅紀錄片《公開試當真》。而參與《公》嘅頻道成員滕毅康，喺去年5月及今年1月先後兩次因店鋪盜竊而被捕。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！