香港4大越南法包推介 必食灣仔新店炆五花腩越南法包

越南法包係越南人民嘅庶民美食，麵包香脆輕身，加埋超豐富嘅內餡真係好滿足，又可以簡簡單單當一餐～今期揀咗幾間有越南法包嘅餐廳畀大家，麵包控唔好錯過！

炆五花腩越南法包 品味

由定居香港多年嘅越南籍店主主理，大部分食材都由越南空運直送，而肝醬、肉鬆等重要材料更交由當地專屬嘅廚師團隊特別預製，確保味道正宗～包體就係店主專程向胡志明市最受歡迎嘅法包名店學習，將配方交由本地工場新鮮製作，外脆內鬆軟！招牌口味特別夾有近十款食材，當中包括越式叉燒以及共四款風味嘅雜錦扎肉，好有層次～炆五花腩口味則肥瘦適中，入口有微微溶化嘅感覺，出色！

越南師傅出品 Try My Bread

長沙灣人氣麵包店，正宗越南法包嘅包體係一位越南師傅嘅出品。內餡材料非常豐富，包括嚟自越南嘅肝醬、扎肉、燻蹄、豬肉絲同蛋黃醬，蔬菜如芫荽、辣椒、青瓜、自家醃製酸菜就選用本地食材，新鮮爽脆。另外仲有供應香煎雞扒同香煎豬頸肉口味，兩者都煎得好香又惹味。

性價比超高 蔥仔越南包

大角嘴嘅越南包小店，喺區內都小有名氣㗎。佢哋嘅越南包可以揀半個或全個，啱晒胃口細嘅朋友們～獨沽一味只賣一道Banh Mi，濃味嘅扎肉、肝醬、烤肉、肉鬆再混合清新解膩嘅甘荀、酸蘿蔔、芫荽同辣椒，真材實料，法包新鮮香脆唔會𠝹口。全條九吋加埋湯或者菜都只係$58，難怪咁受歡迎。

高質屯門越南小店 Tuen Mun Baguettes

屯門越南外賣小店，可以係該區最人氣嘅越南法包，皆因佢好味又大大份！法包香脆帶點嚼勁，餡料有三款可以揀，包括烤牛肉、烤雞或者香茅豬扒，三款都超足料，食到最後一啖都仲有肉。香茅豬扒嘅香茅味好突出，配埋多樣嘅配菜如芫荽、肉醬、青瓜、酸瓜、醃漬酸白蘿蔔、紅蘿蔔等，酸酸甜甜清新開胃。

文：Yanica
編：Cathy