鄧麗欣（Stephy)獲東方昇邀擔任《國家級高峰會》首集嘉賓 與台男蜜運罕談婚姻愛情新想法
鄧麗欣（Stephy）早前上毛記電視接受「東方昇」王嘉偉訪問，Stephy宣傳今年即將舉行的演唱會，又談及其演藝路及愛情觀。
東方昇主持的深度訪談節目《國家級高峰會》，首集邀得Stephy擔任嘉賓，現正與有翻版Rain之稱的台灣男友蜜運中的她罕有談論愛情觀。東方昇問Stephy：「今時今日對愛情有咩睇法呢？」Stephy回答：「睇法？睇法就係順其自然囉，佢從來都係咁㗎啦。」東方昇說：「都其實都係。因為......我發覺我有個觀察就係呢，因為我都三十幾差唔多四十歲啦，我有啲同學呢一係就好早結婚，一係呢唔結婚嗰啲呢，就係順其自然囉，對佢嚟講係有嘅有冇嘅冇。」Stephy接着說：「都係嘅，可能咁樣係最好嘅，同埋我覺得近年，即係唔知呢𠵱家呢個年代，可能好多人都選擇唔結婚啊，或者唔要小朋友，咁佢兩個人如果唔要小朋友唔要家庭，咁就更加順其自然啦，係咪？即係唔需要有咩壓力啦。」
為《圍爐取戀》擔任主持的東方昇指很多問題都源自於覺得社會需要你做甚麼、家人需要做甚麼，以致變得很辛苦，「其實，忠於自己係最開心。」Stephy認為：「我以前都係成日諗呢啲嘢嘅，即係點解好似一個既定咗你，一個社會就既定咗你幾多歲你要點你要點，你做唔到就好似你錯咗咁樣，但其實唔係㗎嘛。每個人都有自己生活、自己嘅想法、自己選擇，係唔需要理任何人點睇你。」
