趙希洛離巢TVB靠陳智燊鼓勵轉型做YouTuber 法律系畢業兼家底雄厚被封「隱形女筍盤」
趙希洛（Candice）2007年參選香港小姐競選入行，多年其演技備受觀眾肯定，被封TVB「御用癲婆」，2019年憑《金宵大廈》「王敏儀（何太）」一角獲得「最佳女配角」殊榮。當大家以為佢將會邁向女主角之際，趙希洛於2023年選擇與TVB結束16年賓主關係，上個月宣布開設YouTube頻道轉型做YouTuber。
趙希洛日前出席活動時其衣著亦作出轉變，穿上淺藍色抹胸短裙，大騷豐滿上圍及長腿，佢又於社交平台分享照片，指活動當日近距離接觸到兩位自己真心喜愛嘅超級巨星：《魷魚遊戲》主角李政宰及陳靜（Gemma Chan），表示李政宰真人比上鏡更有魅力，但就好後悔因為害羞而未有上前合照。趙希洛喺首條發布嘅YouTube影片以超流利全英語介紹自己，又指轉型做YouTuber係因為得到好友陳智燊鼓勵，希望畀大家認識更多佢嘅另一面，認為跨出舒適圈絕對唔係一件容易嘅事，學習拍攝和後製對佢嚟講係一個漫長嘅學習旅程。
趙希洛媽媽為前藝人梁小玲，爸爸趙崇康係澳洲大律師；趙希洛畢業於英國法律與商業系，當年為追逐演藝夢而放棄當律師，而佢家底非常雄厚，有指其爸爸還經營石油生意；又有傳父母贈予8千萬半山梅道豪宅畀趙希洛自住，屋企有司機，於TVB工作時就曾被影到多次有司機車出車入，因而被指係「隱形女筍盤」。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
