83歲蔡瀾大談生死話題 比起面對疾病更怕窮：決定喺香港死

被譽為「香港四大才子」之一嘅蔡瀾2023年因救太太而不慎跌倒，令股頸骨摔碎，一度閉關休養及不時要靠輪椅代步。蔡瀾於太太離世後曾分享指認為太太比佢先走一步係好事，又決定斷捨離，將所有收藏品送走以及出售舊居，改住全海景酒店服務式公寓，聘請8人團隊照顧起居飲食，包括助理管家、專業醫生護士、秘書、助手及司機。現時，蔡瀾過著簡單又隨意嘅生活，起床就飲茶、打遊戲等等。蔡瀾日前接受谷德昭主持嘅節目《爆谷一周》訪問，當中更大談生死話題。

蔡瀾於太太離世後，曾透露入住全海景酒店服務式公寓嘅原因，指當時有朋友約佢到酒店套房，睇到窗外嘅美景就決定要好好享受。谷德昭與蔡瀾今次嘅訪問亦喺蔡瀾嘅公寓進行，套房環境因而曝光，谷德昭不忘參觀蔡瀾嘅廚房；廚房內放滿各式各樣調味醬料，又有一部大雪櫃，原來係因為蔡瀾入住時嫌雪櫃太細而更換成大雪櫃，又指亦係為咗製冰器用嚟凍嘢。谷德昭與蔡瀾傾計嘅過程中，又將20年前蔡瀾接受訪問嘅問題重問，蔡瀾如同20年前一樣坦言依然最愛香港：「喺第二度地方搵唔到雲吞麵好似香港咁好食。」

蔡瀾對於死亡話題一向不忌諱，曾公開表示對塵世無太多留戀，即使呢刻去世都無遺憾。蔡瀾喺今次訪問中又再提及及時行樂和死亡話題：「我而家開畫展，嗰啲全部捐出去。之前去星馬開書展都唔收錢，用晒去買救傷車，我覺得人生都係飲飲食食，唔使有乜嘢大意義。」谷德昭問及係咪洗晒啲錢先離開，蔡瀾直言：「洗唔晒」，又指決定喺香港死：「最好係唔知唔覺咁走，無恐懼亦唔需要受痛苦，我到而家仍想到時搞個party畀大家玩，不過老友已經越嚟越少。」

谷德昭於節目播出後，於社交平台分享訪問感受及因節目時間所限而被迫刪走嘅對話內容。有網民指谷德昭今次訪問表現緊張；就此，谷德昭解釋指的確係緊張，笑言似中學生：「其實說得沒錯，蔡San是我的人生導師，我從中學開始閱讀他的文字，一點一滴地薰陶著我，啟發了我的愛情觀、人生觀、世界觀。蔡San正過著如神仙般閒雲野鶴的生活，肯抽出時間上《爆谷》，我只怕待慢，故有些像中學生見老師般的笨拙，大家請見諒。」谷德昭更分享與蔡瀾無曝光嘅對話，佢詢問蔡瀾面對疾病時是否恐懼，蔡瀾笑指自己驚窮多啲；對於係咪相信有神，蔡瀾則指：「對我好的我就信。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！