雲浩影美貌惹網民討論 零死角美女被指靚但普通引真人現身留言

《2024年度叱咤樂壇流行榜頒獎典禮》於1月1日晚上圓滿結束，賽果以外，最多人討論嘅就係阿正扮跌等周殷廷扶，但周殷廷未有任何動作嘅一幕；此外，仲有唔少人討論雲浩影（Cloud）到底靚唔靚女。

雲浩影於《2024年度叱咤樂壇流行榜頒獎典禮》首奪女歌手銅獎，以及憑《回憶半分鐘》勇奪叱咤十大歌曲第4位，獻唱歌曲時攝影師不時以超近鏡及低炒方式拍攝，唔少網民大讚雲浩影即使喺咁近鏡，以及喺死亡角度下都依然係咁靚女，而且皮膚白滑近乎零毛孔，絕對係一名零死角美女，又指雲浩影坐喺台下一眾歌手中都非常突出，一眼就見到佢。

日前，有網民喺社交平台以「關於雲浩影靚唔靚」為題，混合雲浩影於叱咤嘅鏡頭及《唐白虎點秋香》片段製成惡搞片。片段中，當鏡頭係雲浩影時，就即轉到周星馳嘅對白：「車！普通料嚟！」，而當鏡頭影埋其他女歌手嗰陣，又轉到周星馳講：「咁睇佢又真係索到啪啪聲」， 非常搞笑。另外，又有網民PO出雲浩影於叱咤直播嘅截圖詢問其他人：「究竟Cloud靚唔靚」，唔少網民都表示靚到癲又有仙氣，但都有網民認為未去到好靚嗰種：「中上，未去到望完又想再望嘅感覺」、「嘛嘛哋，100分有74、5分左右」、「普通人黎講算靚嘅但同明星比又爭幾條街」、「靚但普通（無星味，即响街唔會認得）」等等，有網民就話大家要求太高，認為雲浩影咁都唔靚的話，唔知有邊個靚：「咁都唔靚，大家要求都幾高下」、「Cloud 點會唔靚」等等。該帖文又成功令雲浩影現身留言：「我覺得一般」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！