王星披露禁錮內情 練打字疑做電騙 女星估計等錢使上當 曝內地演員片酬得咁少？

日前內地演員王星前往泰國後失蹤，其女友嘉嘉喺網上發起尋人，迅即引起網民討論。終於王星喺尋日（7日）獲確認人身安全，並由當局安排由緬甸返回泰國。

內地環球電視網CGTN報導指，王星喺泰國官員陪同下見記者，以英文向協助救援的各方人士致謝，讓佢可以回國，又重申泰國非常安全。後來喺泰國人員提醒王星將「之後仲想去泰國」等重點用國語講多次，王星隨後就以中文講「我在這裡感謝泰國的政府和當地的移民局能夠把我安全地送還到這邊，非常感謝他們。泰國挺安全的，以後有機會的話，我還想再次來這邊。」

至於失蹤幾日嘅經歷，泰國警方向媒體披露，本來以為參與拍攝嘅王星，去到曼谷落機後，接頭人話車佢去出席開鏡禮，到抵達泰緬湄索邊境後，有人以船隻接佢過境，當時先意識到自己被騙，但係唔敢反抗。王星承認去到緬甸後被剃光頭，並安排同另外約50名同胞逗留喺一座建築物內，而且要練習打字，王星估計係要佢做電騙。

王星失蹤事件後，唔少網民都想知點解王星不虞有詐，以為去泰國參與表演工作。同王星合作電視劇《理智派》嘅內地女星邵逸凡，喺網博發文直言王星係「草根演員」而唔係「什麼男明星」，認為王「太想拍戲了」。邵逸凡又爆同王星聯絡嘅工作人員「十六」，聲稱微信帳號一個月前被盜用。

邵逸凡談及內地演員辛酸，指「大部分演員就是一年平均下來一天208塊（人民幣）都賺不到的人」。邵逸凡話自己一年只係拍戲的話，片酬加埋「也就3萬人民幣，而我已經出現在很多很多大戲和明星對戲了」，收入主要靠自媒體同做model賺取。因此邵逸凡估計王星「如果不是實在沒戲拍，需要錢，也不至於放鬆警惕上當受騙」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！