60歲劉美君自爆同型佬混血男友復合 8年前分手因為更年期情緒不穩？

型盡多年嘅女歌手劉美君早前返港為TVB台慶演出，之後同唔少朋友聚會，並接受好友之一鄭丹瑞嘅youtube節目《健康旦》訪問。

因為早婚早生嘅關係，劉美君未夠50歲就成為嫲嫲，上個月先「登六」。鄭丹瑞問到劉美君50歲前後有冇感到身體變化，Prudence就分享咗更年期嘅體會，仲自爆正正因為更年期情緒，8年前同混血型佬男友Steve分開，而兩個人原來已經復合！

劉美君喺節目度憶述，四十幾歲時覺得自己好靚，同時亦感覺到快將步入更年期，於是好好調理身體去迎接。Prudence笑言2016年同Steve分手前情緒好波動，二人成日有磨擦，但Prudence話唔會嗌交只會黑面。劉美君話佢亦發現Steve都有更年期症狀，為咗大家健康著想於是同Steve分手，Prudence選擇返香港工作，做唱片、搞演唱會同監製演出，而且做運動同進補調理身體，令自己唔好只著眼於身體變化。

雖然分手，劉美君同Steve仍然關係良好，Steve不時同Prudence家人見面，甚至一齊飛到香港探Prudence。鄭丹瑞本來想問劉美君同Steve係咪關係如常友好，Prudence就自爆佢同Steve已經復合！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！