鄭欣宜被爆已回港 商台DJ梁文禮出post披露遭網民鬧爆

去年3月欣宜舉行完紅館演唱會後，突然絕跡幕前以至社交平台，因此被傳媒指佢掛住拍拖而「潛水」。Joyce嘅經理人林姍姍回應傳媒時話「Joyce的確係病咗，療傷之中」，但並未交代具體情況。

商台DJ梁文禮尋日出post，聲稱喺街上撞見鄭欣宜，「啱啱撞到欣宜！我一手捉住佢，大家即刻攬一嘢。佢狀態好好，我即刻問係咪要迎接你復出？佢笑一笑話：畀啲時間我…OK唔俾壓力妳，等妳。really miss you」。有網民多謝梁文禮為欣宜報平安，亦有人批評阿禮出post搏流量。

欣宜「神隱」後，曾經有傳媒報導過，佢喺廟街同街邊唱歌檔嘅姐姐玩busking﹐又有網民喺日本東京成田機場影到Joyce同男友Derek以及髮型師好友Benjamin一齊去旅行。去年底Joyce為好友許廷鏗MV《一場同學》演出，又為動畫片《星願奇緣》擔任粵語配音，似為復出做足準備，不過之後欣宜又再消息杳然。到今年初再有傳媒收到讀者報料，聲稱影到欣宜喺加拿大溫哥華拜祭亡母肥姐沈殿霞。拜祭期間，欣宜不時落淚，令人更覺心痛。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！