霍啟剛被群眾攔截強行自拍面有難色仍有求必應 網民讚有涵養「不得不佩服貴族的教養」

日前黎明出席香港影視博覽擔任嘉賓，完成儀式後準備下台之際，有位男子衝上台想同Leon自拍，醒目嘅Leon喺保安擋駕之下笑笑口閃身走人，足見黎明IQ EQ一樣咁出色。

呢啲強行自拍其實時有發生，好似立法會體育、演藝、文化及出版界議員霍啟剛，就被拍到現身影視博覽時，遭受一群現場人士包圍，並且拎起手機影相，其中一位女子更加係跟住霍啟剛邊行邊自拍。面有難色嘅霍啟剛本來都面露微笑，但係行行下霍公子突然停低，伸手攔住自拍女子手機。中間再有一名男子同樣出手機「隊」喺霍啟剛面前，霍似乎亦有出手阻止。霍啟剛後來一臉認真向該兩名意圖同佢自拍嘅男女講咗幾句，之後亦都順從要求同佢地合照，而且換上親切笑容。

片段喺小紅書流傳之後，有網民戥霍啟剛要「被迫營業」覺得好慘，又指「他已經很客氣了」、「路人太無理了」、「換個人直接把你手機砸了」、「不得不佩服貴族的教養」。亦有人發現，出身豪門嘅霍啟剛當時居然只有隨行助理跟身，一個保安都冇，十分難得。

霍啟剛太太郭晶晶係中國國家隊跳水皇后，二人更曾現身內地綜藝節目，咁梗係多人識啦。不過想selfie係咪都問人一句先好啲呢？