Hey Brother男團出道 5成員加埋280歲 新歌《我為人人》被讚正能量

黃智賢、李思捷、麥長青、曹永廉及唐文龍加埋足足280歲，日前（10日）舉行記者會宣布以組合形式「Hey Brother」出道，同時發布新歌《我為人人》，獲無綫高層何麗全、新城廣播代表和一班「福祿壽訓練學院」學員現身支持。

Hey Brother成團和歌曲籌備逾兩年時間，表示成員們陪住大家成長，但就未試過組成男團，今次成員們都投入咗大量時間同心機去表現。於記者會上，Hey Brother即場推介出道歌曲《我為人人》，又指佢哋之間並無隊長，大家咁高咁大，暫時亦無乜爭執發生，不過大爆唐文龍係最長氣嗰個，表示唐文龍每次語音都用盡60秒以及日記式回覆。對於未來發展，Hey Brother預告將陸續推出新歌，安排演唱會，更會齊齊拍攝由李思捷編監導嘅新片。環星唱片公司老闆張國林和關嘉敏亦擔任記者會嘉賓為Hey Brother送上「2025 Men爆男團」獎項，寓意祝Hey Brother攞獎攞到手軟，對於攞獎目標，五子則笑言：「金曲金獎！」

網民對於Hey Brother出道持不同意見，部分網民唔太睇好，又指MV成員鏡頭分佈唔平均：「你唔尷尬，尷尬既就係人地既黃金示範」、「尷尬 ! 尷尬 ! 尷尬 ! 尷尬 ! 尷尬 ! 」、「7到一個點」等等；但都唔少網民表示支持：「中年好聲音暨好組合」、「我覺得呢D（啲）就係香港流行曲」、「唔錯，首歌有主題，起初擔心佢幾個扮後生年青偶像，唱一啲諷刺現實嘅歌反而啱佢哋」、「正能量，我最喜愛men爆男神，個個都獨當一面」、「幾位大叔又唱得幾好，支持，加油」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！