黃翠如陀巨肚照着3吋皮靴 1原因穿露肩裝 談萬千頒獎典禮爭女配角獎咁答
有「翠如BB」之稱的黃翠如現時陀着BB將成為「蛇年媽媽」，她昨日（9日）挺着巨肚出席商場活動，腳踏3吋皮靴行得緩慢但穩健，散發孕味之餘顯得明艷照人。黃翠如身穿粉紅色露肩鬆身連身裙，完美遮蓋巨肚，但巧妙地露出白滑香肩，原來選擇這件衣服大有策略，她笑說：「大家都睇得出我真係肥咗好多哩？因為依家我成個人除咗膊頭仲有啲較瘦嘅感覺之外呢都冇乜㗎喇。」
快將成為人母，黃翠如已率先感受到小生命的活力，「每日都喺度學識緊新嘅大肚婆生活，因為每個階段都有唔同嘢」，她表示隔着肚皮也感受到BB在跳動和翻身，「而家逢親夜晚瞓覺嘅時候，我feel到係BB最精神嘅時間，已經唔係踢咁簡單，會feel到佢成個轉身」。她形容摸肚時感到小手剛剛掃過，能感到BB的動作，又指會叫丈夫蕭正楠摸肚感受BB的跳動，同時多謝丈夫在這段時間適心照顧，又包起家中所有事務，但她表明會尊重長輩的忠告，所以暫時不會公布BB的性別。
無綫的《萬千星輝頒獎典禮2024》將於本月19日在澳門舉行，黃翠如憑《黑色月光》提名最佳女配角，但表明仍未知能否出席。至於有否信心撼低大熱人選，即同劇的「家姐」楊卓娜，黃翠如表明：「真係冇乜所謂，呢個家姐，我好希望佢攞到，一來大家都知道佢演技好，二來佢個人係一百分，我劇中兩個家姐（楊卓娜和楊茜堯）一個（提名）最佳配角，一個（提名）最佳女主角，我都為佢哋有啲興奮，希望佢哋可以有收穫」。
當被問及是否希望成為萬千頒獎典禮首位懷孕上台獲獎的女演員，黃翠如笑言：「真係冇乜所謂，我亦都自問，每一個人都好努力，每一個人都努力咗好多年，對於每個人嚟講，呢一個獎都係鼓勵大家努力，每個人攞都開心。」
