The Do Show ｜劉青雲再澄清郭藹明冇喺太空總署工作過 否認唔俾太太拍戲「係佢自己決定」

劉青雲近期為電影《爸爸》宣傳，並接受鄭裕玲Do姐嘅youtube頻度訪問。搵得劉青雲一定講起郭藹明，Do姐問及唔少二人相識相處軼事，青雲都一一作答。

劉青雲同郭藹明因為拍經典劇集《大時代》而結緣，但喺訪問中青雲表示第一次遇見郭藹明並唔係拍《大》嘅時候﹐而係喺電視城一廠行過驚鴻一瞥。「佢喺度排緊唔知乜嘢節目，係同鄭丹瑞喺台上跳舞，我收工經過一廠攞車，喺個黑暗位望住台上面嘅佢」。Do姐問係咪一見鍾情，青雲話「見到個好漂亮嘅女仔喺台上，你話有冇鍾意佢？係有些少」。之後劉青雲同郭藹明一齊拍《大時代》，《大》監製韋家輝安排二人去canteen傾偈，但青雲同Amy都係冇兩句。直到拍《大時代》後期雙方先正式交往，因為當時大家都好專注去拍劇。

至於第一次單獨見面經過都十分有趣，劉青雲話有一次同朋友食飯，見到郭藹明喺TVB做緊節目，突然青雲想打電話去TVB化妝間搵Amy。「最有趣嘅係，我唔知化妝間幾多號電話，但係同我一齊食飯嗰個人知喎！」，於是就約郭藹明出嚟飲杯嘢。劉青雲笑言郭藹明應約後以為青雲想向佢借錢！而青雲亦向Amy表示想見對方，後來二人開始交往拍拖，並於1998年結婚。

劉青雲向來盛讚郭藹明，今次訪問都唔例外，認為太太嘅優點係善良，唔會「跣」佢，而且性格獨立。「佢好細個喺外國讀書，佢靠自己努力攞獎學金，係好獨立嘅女性。」劉青雲自言欣賞性格獨立嘅人，唔認為女性一定要結婚，甚至婚後要放棄一切。「我覺得係唔公平， 我覺得你應該擁有自己嘅嘢，我有返我嘅，咁樣先係fair。唔係有一日你為我犧牲太大，你總會覺得『我係為咗你』，就算佢唔喺個心唔舒服……咁我覺得咁大嘅恩惠，我報唔到俾你架喎？你會唔會有日覺得我無情無義？」。

郭藹明曾經係TVB花旦之一，但已經淡出幕前多年，劉青雲強調冇要求太太唔做演員。Do姐問Amy想唔想復出，青雲話呢個係太太自己決定，但機會唔大，並再三表示「好多人以為我唔畀個老婆出嚟拍戲，我點會唔畀？」。

2015年劉青雲憑《竊聽風雲3》三度成為金像影帝，喺台上以「太空船論」感謝太太，青雲受訪時都有講起，得獎前有準備講咩，但並冇諗定成段稿。「太空船論」出街後，網上流傳喺美國讀工程碩士嘅郭藹明曾於太空總署工作，劉青雲亦藉機澄清並無此事。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！