「歌神」張學友親自澄清欠債傳聞 ： 好多朋友問 「你係咪爭人周身債」

現年63歲嘅「歌神」張學友出道至今40年，上月23日喺海口完成第218場演出，亦係佢第1,000場個人巡迴演唱會，成為史上首位巡演場次突破千場的華語歌手，認真厲害！日前佢到廣州舉行第219場演唱會，期間罕有開腔澄清欠債傳聞。

喺疫情期間，張學友已被誤傳破產，當時佢亦有否認，並指自己有存錢習慣，所以經濟狀況冇問題。不過之後又傳佢投資失利導致欠債，要開個唱還錢。由於傳聞越傳越烈，張學友喺演唱會廣州站上親自回應澄清傳聞。

喺傾偈環節中，張學友除咗表示唱歌係佢唯一嘅興趣之外，佢仲話表示：「我啱啱開咗一千場演唱會，好多朋友問我仲『唔夠』，我夠，即係我夠使呀。好多朋友問咁樣做，係咪真係好大件事，唔夠使呀？你係咪爭人周身債，我聽講㗎啫。我想同大家清楚，本人理財係屬於孤寒嗰種嚟嘅，啱啱之前上網見有啲人話我着住嗰件衫係10年前著過㗎喎，我想話俾大家聽我好多衫而家着緊嘅係20幾年前著過㗎，首先證明咗第一樣嘢20幾年前嘅料係好好，著極都唔爛先啦！第二件事就係我嘅身材係保持得好好㗎，真係唔係講笑，呢20幾年都係一直維持150磅左右，到而家都係。」

之後，佢再表示：「再講清楚一次，我真係冇無爭人錢㗎，我真係冇呀。我好細嗰時我媽同我講，喂阿仔呀，借錢好難㗎，自己要俾心機呀。呢件事我記住好耐，其實我係好驚嘅，所以我唔係好敢嘅。其實我做每一場演唱會都係為自己而做嘅，為咗自己過得開心，為咗希望可以令到更多想聽我唱歌嘅朋友可以聽到我唱歌，係咁多喇，好唔好呀。所以大家放心，我亦可以同大家保證喺我嚟講係冇一個退休年齡...唔使驚，大家仲有排玩呀放心，好唔好呀?大家畀心機」。同時，佢表示自己會繼續努力，保持身體健康，希望可以企喺呢個舞台有一日多一日，希望可以喺70歲之前再開演唱會同大家見面。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！