劉家昌病逝︳曾苦追甄珍14年 離婚30年先公開 發文互罵極難睇

因病逝世嘅劉家昌有過兩段婚姻，但最終都以離婚收場。1966年劉家昌與台灣知名女星江青結婚，二人育有一子。但據媒體報導，原來同江青結婚前，20歲嘅劉家昌早已對當時只得15歲嘅甄珍一見鍾情，甚至自爆苦追甄珍14年。劉家昌曾經喺電視節目中透露，同江青結婚，係因為江青破壞佢同甄珍，結果俾節目主持蔡康永寸「不是她破壞，是你自己沒有守住」。

後來甄珍同謝賢結婚，劉家昌自言得知消息後，難過到企唔到起身。劉家昌同江青嘅婚姻僅僅維持4年，劉曾指江青有外遇導致離婚，而江就反指劉家昌經常出軌。甄珍同謝賢嘅婚姻同樣觸礁，並於1977年離婚。翌年劉家昌甄珍終於成婚，育有一子劉子千（後改名章立衡），但婚姻只係維持九年就鬧翻。

劉家昌同甄珍收埋離婚消息30年，甄終於因為劉家昌發文辱罵而大爆內情。甄珍指，佢同劉家昌喺劉子千一歲時離婚，原因係有人豪賭成性。之後劉家昌好少理屋企，兩母子相依為命，後來子千長大後獲得華納賞識簽約出唱片，但劉家昌突然要求華納同劉子千解約，仲要脅製造負面消息，唱片公司為免麻煩只好答應。後來劉家昌要劉子千唱《唸你》，劉子千為免甄珍難做，只好硬食。

甄珍仲爆，《唸你》推出後劉子千唔願意再被爸爸主導音樂風格，劉家昌就威脅會「對外說你在家打爹罵娘」，務求斷子千米路。而據甄珍所講，劉家昌多年來都有問佢攞錢，甚至拎完錢先再去香港申請離婚。至於令劉家昌鬧爆個仔嘅導火線，係劉喺網上節目怪子千唔理佢，甄珍話完全不符事實，唯有出信以節目未經授權播放劉子千歌曲為由，要求移除內容，就咁焫著劉家昌。

劉家昌同甄珍於2018年更爆出爭產風波，搞到對簿公堂。劉家昌砲轟甄珍與劉子千無情奪產，「這對母子貪得無厭異想天開」，大鬧兒子「不忠不孝、不知羞恥」，更大爆甄珍陪兒子到北京宣傳時為兒子安排不道德交易。甄珍就斥責前夫顛倒黑白是非。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！