啟德全新高CP值火鍋店 亞洲風味湯底×自煮炊飯
食完火鍋再用餘下嘅湯底做炊飯，聽落係咪好滿足呢？啟德一間全新火鍋店就以此為題，推出高CP值火鍋套餐廳，最平$68就有交易，升級配埋炊飯都依然抵食！
亞洲風味湯底
湯底有9款選擇，包括日式、川式、台式、韓式風味，留意「茄元氣鍋」係素鍋，唔會配肉盤啊。如果想清潤啲，茸美人鍋（即養生姬松茸湯）好啱而家嘅天氣，啫喱狀湯底慢慢煮熱時散發香噴噴嘅菌香，入口好清甜。鍾意川辣口味嘅朋友，不妨試試胃覚醒鍋（即黃金酸菜湯），初初可能覺得唔太辣，但辣味會愈煮愈出，配牛肉同海鮮都好夾。
牛肉×海鮮
最高質嘅牛肉有充滿油香嘅日本產黑毛和牛肩胛肉，同埋肉味較濃嘅美國SRF和牛肩胛肉眼心，蘸埋帶芝麻香嘅日本產炸蒜醬更加滋味，想試可以揀單點或藥膳白鍋套餐。
留意套餐所配嘅肉類都唔同，皆因餐廳將同湯底最夾嘅肉類作配對，當中包括Prime牛肩脊肉、牛五花、牛小排、牛舌、豚梅肉等。
海鮮只有兩款單點拼盤，而「魚介の饗宴」就包括半殼扇貝、半殼蠔、蝦同埋魚滑。其中半殼蠔有驚喜，蠔肉近9cm長，煮熟都依然飽滿。另外半殼扇貝都好厚身，味道鮮甜。
火鍋變炊飯
呢度嘅火鍋仲可以升級配料，自行煮成炊飯！3款口味包括，玉子、蟹肉蟹膏同埋豬油渣，每款嘅配料都有分別啊。蟹肉蟹膏加上香蔥，配清香偏日式嘅湯底最夾；豬油渣雜炊飯則有豬油渣、菜脯、香蔥/芫荽，加入胃覚醒鍋嘅話，辣味會中和油膩感。
好鍋日子
地址: 九龍城啟德承啟道38-39號啟德體育園啟德零售館1 2樓M1-206號舖
文：Cathy
相、片：Tom
