直擊啟德零售館 逾50個餐飲+食品商店 設限定優惠/美食

啟德零售館今日開始試業喇～場區設有3個館，1號館近啟德地鐵站，3號館則近宋皇臺地鐵站，兩邊D出口行過去都係大約8分鐘，交通尚算方便。未計主場區，現時已有逾50個餐飲同食品商戶陸續進駐，即睇有咩精選推介啦～

啟德零售館1

館1主要嘅餐飲集中地喺2樓，有佔地二萬呎嘅特色美食廣場同餐廳，其中「幸福・羽」米線、「花鮮・甲」海鮮花甲粉專門店、「好鍋日子」一人主題火鍋店都係全新品牌，約8至9成店舖已經開張。

1樓嘅In-mark主打各種印尼食品，喺度可以揾到特色千層蛋糕，包括班蘭芝士、朱古力等口味。

2樓美食廣場設有Jollibean、PHI、幸福・羽、花鮮・甲、JMT、幸福巷子、Tiger group、蝦麵店、Pepper Lunch。周邊則有敏華冰廳、安金稻拌飯、好鍋日子、兩姊妹涼皮有限公司同麻滋麻美，橫跨花甲鍋物、雞湯米線、梳乎厘班戟、豆乳甜品、韓式飯卷、日式火鍋等多元化食品，定價幾十蚊起好親民。

3樓保齡球場內設有迷你酒吧，會供應西式同港式小食，以及一系列酒類同無酒精飲品。

館1地下外圍就有美珍香同陳茶館，向主埸館方向行過去，會見到啟德體藝館，入面有人氣小食真章魚無雙、Subway、啊一檸檬茶、倆仨杯、Enjoy Appolo同埋吃茶三千，想揾小食或飲杯嘢可以嚟呢度啊。

啟德零售館2

館2係主食餐廳集中地，種類多元化，無論日式燒肉、泰式餐館、漢堡包專門店、韓式薄餅等等都有，另外日式超級市場、清酒機、本地烘焙咖啡、台式甜品、麵包小店亦都匯聚喺館2，部分設有開業優惠同限定品𠻹，現時大約7至8成店舖營運中。

啟德零售館3

館3同啟德青年運動場相連，餐飲以港式風味為主，如新派茶餐廳、清湯腩粉麵店，另外西式Cafe、燉湯、越式餐廳都有㗎，不過而家只有約一半餐廳開業。

運動健康中心

留意館3後面有一座獨棟建築，係運動健康中心，現時設有音速小子主題遊戲，而4樓就有間酒吧餐廳Hungry Tiger。

文、相：Cathy