歐倩怡搵旅遊達人袁學謙做經理人 雙方認識十年以上 網民估咩關係

歐倩怡同郭晉安宣布離婚後，較以前讀書湊仔時有更多曝光機會，不過喺接受蝦頭、連詩雅主持嘅《絲打圍爐》訪問時，自爆多年前曾經患上重感冒，聲稱身邊人懶理佢又暈又嘔都冇叫十字車，仲話自己之後攬住痰罐暈咗。呢段經歷引起外界嘩然，郭晉安其後回應「痰罐」事件，強調屋企冇痰罐，令歐倩怡反而成為眾矢之的。歐倩怡對於失言就話「以後會小心啲」，仲承認因為要交租而「等錢使」，但對於贍養費問題，佢就封口不提。

搵錢交租嘅歐倩怡近排簽咗經理人，原來係中學校友、旅遊節目袁學謙Benedict。袁學謙早前受訪時講到同Cindy識咗好多年，2011年時膽粗粗約對方訪問，之後雙方一直有聯絡，早前歐倩怡主持HOYTV節目《健康關注組》就係由袁學謙牽線。作為經理人梗係要為藝人包裝，袁學謙強調歐倩怡份人好真好簡單，只係十幾年冇出嚟做嘢，需要時間熟悉工作模式。

袁學謙曾經為多個旅遊節目做主持甚至製作人，包括TVB嘅《離地自由行》同埋HOYTV節目《學人去非洲》。幕前工作以外，袁學謙開過茶飲店，早前開咗間花店，但係做經理人都係第一次聽見，於是網民紛紛思疑二人關係。袁學謙嘅茶飲店開幕時，就搵到仍未離婚、甚少露面嘅歐倩怡撐場，似乎交情匪淺。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！