我把風扇壞咗 落深水埗搵波叔修理風扇

天文台說今年氣溫又創新高，氣溫高達攝氏 34.8 度，若不開冷氣，簡直想死；偏偏家裏的風扇壞咗，連個天都唔鍾意我。事實上，今時今日要買一把風扇三數百元有交易，甚至買大陸老番名牌都係幾百蚊，買過一把仲平；題外話，豈止是風扇，或者現在電子產品真的太平，還有幾多人會填保用證搞保養？

「風扇醫院」其實是間鐵皮檔

言歸正傳。當我上網搜尋「修理風扇」，竟然找到深水埗景隆街波叔，被譽為「風扇醫生」，今年八十有四，修理風扇已有四、五十年經驗。我家住香港島，乘車到深水埗要$11.8，擔着風扇也足足走了20分鐘。去到「風扇醫院」（那是波叔的招牌），醫院其實是一間鐵皮檔。

吓，波叔竟然不在？！一旁買衣服的姐姐笑說：「波叔可能去了小便。」放下吧，一小時有取。之後，我去了福榮街維記食豬膶米。

八十年代風扇也是奢侈品

一小時後回來，波叔說：「風扇已修理好。」一試，竟然動也不動！波叔喃喃道：「無理由㗎，明明搞掂。」於是又拆開摩打，拿起電錶量量電流、駁過線。這一次，風扇終於「伏」、「伏」、「伏」作響，我的風扇重生了！這時，才問起波叔的故事。原來波叔以前做裝修工程，一次工傷令他不得不轉行，結果跟了維修電器的老友學修風扇，邊做邊學。那些年（八十年代）哪有冷氣，人人都用風扇，「唔好睇少，其時一把風扇都要幾百蚊，奢侈品來的。」所以，若遇上風扇失靈，人們還是拿去修理。以前的風扇結構不會太複雜，就是摩打、電容和扇頁。「你把風扇電容壞咗，我幫你換了粒『樂聲』電容，好嘢嚟㗎！仲有，你係咪自己拆過扇頁？你裝得唔好，『kick住、kick住』，幫你裝番好；還有幫你唧了機油，肯定大風過之前。」波叔牙擦擦地說。「我把風扇係咪好嘢？」我問。他冷眼看我，只笑了笑。

風扇舊的好？

「以前風扇好襟用，八、九十年代的金碧扇、三荾牌風扇，用料好，風力又夠，肯定比現在代工的風扇襟用得多。」現在，新式的鴻運扇或無扇頁風扇更多是電腦組件，修理起來麻煩得多。「我都識整，不過麻煩啲，可能修理都要幾百蚊；有時修理唔到我咪唔收錢囉。」所以，現在來修理風扇的大多是老人家上一代人， 因為惜物？「又唔係咁講，冷氣電費貴得多，況且老人家吹得多冷氣不太好，還是愛吹風扇。」果然，馬上有個婆婆來修理風扇。「有時又唔係淨係錢嘅問題，明明風扇只要修理過後還是可以用，因為嫌麻煩就掉到堆填區，真的很浪費。」

真的開心，至少我延續了風扇的生命，沒有製造電子垃圾，為環保盡了點點綿力。最後，你估修理一把風扇幾好錢？答案是人工包料盛惠$120。只是，波叔實在為我的風扇整了好一陣子，又換靈件又拆又裝，他騎騎笑：「俾多$20嚟啦。」我又笑笑，給他$140。臨走望轉頭，見他轉過頭就將$40遞給先前的姐姐（在旁的衣服檔）：「嗱，俾你飲茶吖。」街坊街里，你幫吓我我幫吓你；天氣熱，人情暖，就是一份感情。

風扇醫院
深水埗基隆街259號

撰文、攝影：郭昊軒 @weak_chickens

這篇文章 我把風扇壞咗 落深水埗搵波叔修理風扇 最早出現於 BetterMe Magazine。