李司棋何啟華接連遇電騙？司棋姐用《溏心》金句回應 網民思疑又係扮騙案賣廣告

而家電話騙案極之猖狂，大家有邊日係冇收過啲奇怪短訊同電話？就連藝人都會被騙徒睇中！

李司棋喺IG story分享，有疑似騙徒聲稱錯誤地過咗2千蚊俾司棋姐，send短訊叫司棋姐還返俾佢，仲聲稱要幫屋企人俾手術費，唔係就會盲。司棋姐似乎知道對方心懷不軌，於是回應「冇收到」、「有呢$2000就唔使盲？名副其實見錢開眼喎」，而騙徒就再次催促。終於司棋姐出大絕，喺錄音短訊用《溏心風暴》金句「我睇人睇咗幾十年，邊個係人邊個係鬼，我一眼睇得出」回敬對方。

事有湊巧，ERROR成員阿Dee何啟華都喺IG story分享有人扮舊同學叫佢去聚餐，阿Dee當然以九唔搭八亂答回應。後來對方叫阿Dee發照片畀佢，阿Dee就用假嘅爆肌相同埋以《毒舌大狀》中嘅律師造型照回覆，又叫Fans集思廣益點回應。

藝人遇到騙徒唔出奇，但係早前森美聲稱收到「AI吳君如」透過視像通話問佢借錢，但係原來呢個「AI吳君如呃錢」事件係手機廣告一則，用嚟宣傳新電話有「AI防詐換臉識別功能」，而吳君如本人更拍片落力推銷。於是網民見到李司棋何啟華接連遇電騙嘅story，都思疑又係扮騙案賣廣告，尤其是佢地個post都有同一個hashtag #我呃大架。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！