聲生不息大灣區季丨林智樂被讚「寶藏新人王」 帶定唱片攞偶像容祖兒簽名展現真性情

林智樂（Felix）於2021年停學參加TVB歌唱選秀節目《聲夢傳奇》，2023年6月以單曲《忘記趁早》出道，橫掃多個頒獎典禮新人獎；現時除咗歌手身份，又為J2節目《J Music》擔任主持。日前，林智樂與同為《聲夢傳奇》出身嘅鍾柔美（Yumi）參加內地綜藝節目《聲生不息•大灣區季》，李宇春、周筆暢、陳小春、古巨基、容祖兒、薛凱琪、衛蘭、譚詠麟等歌手亦有份參與節目。林智樂除咗於節目大騷歌喉驚艷網民，其真性情亦被讚可愛。

林智樂於《聲生不息•大灣區季》與陳小春、黃子弘凡、古巨基等歌手合唱，獨唱環節則演唱彭羚《完全因你》，被網民激讚唱功，留言：「林智樂唱得好，聲線穩有感情，努力加油」、「智樂仔將來一定係超強巨星」、「第一次在大舞台，還有咁多前輩，發揮已經係超水準，智樂加油」、「佢把聲真係好乾淨，好清澈，聽落去好舒服」、「寶藏新人王，強烈要求Filex可以返場做長駐嘉賓」、「沒想過他唱得這麼好」、「Felix已經將這首歌變成自己的歌一樣，非常動聽！加油呀」，又有唔少網民表示見住佢由聲夢到而家嘅進步：「呢個小朋友見住佢進步，拍戲又幾自然，唱歌真係進步左好多，E E（姨姨）都想比d（啲）鼓勵佢，加油啦，希望有人捧下佢啦」、「由三年前的聲夢，見証你每一步的努力。今天很感動見到你上了一個更大的舞台，希望你繼續努力，追求你的夢想」、「經常都講，機會係留俾有準備嘅人，好開心見到Felix把握到今次難得嘅機會，見到內地觀眾勁讚賞Felix，一直睇住佢比賽出道到而家，終於踏上全國性嘅大舞台，俾到更多人認識到佢嘅歌藝，有份莫名嘅感動!!」、「佢好有自己風格，機會真係留俾有準備嘅人」等等。

有網民亦認為林智樂講嘢好搞笑，極具幽默感，又指佢分享感想時緊張忘詞表現相當可愛。於演出之前，林智樂曾於節目剖白心情，表示第一季節目每一集都有追，有幻想過如果自己演釋呢首歌會點樣、與前輩們企埋一齊又係點樣。提到喜歡嘅前輩，林智樂展現真性情，直言：「《雲之羽》就看到......那個.....誰？我不知道那個名字，但是我很喜歡他。」及後先醒起嗰個係丞磊。此外，林智樂帶埋偶像容祖兒嘅演唱會唱片攞簽名，表示聽到容祖兒叫佢加油及首次近距離接觸偶像，反應唔嚟兼成個人震晒，感覺好神奇，又指與周筆暢、李宇春和衛蘭等前輩同台，如同追星日記。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！