黃夏蕙專訪｜《夏蕙傳》劇本初稿提生命中兩男人 登台遇劫難忘「大鼻」救美 抽起沉重情節｜Yahoo
【Yahoo 新聞報道】94歲黃夏蕙希望開拍《夏蕙傳》，劇本初稿以夏蕙姨的喪禮為起首，藉此回顧夏蕙的一生，戲中其經理人Simon的角色更因難以接受而患上精神分裂。但Simon指近期劇本有變，抽起較為沉重的情節，最初電影內容有些諷刺時弊元素，但最終決定更改，「轉做純搞笑，本身第一稿係好慘」，希望電影可以帶給港人歡樂。片中會出現不少經典場面，例如到黃大仙上頭炷香，也會展現夏蕙姨的日常生活及鮮為人知的一面，「佢都鍾意去食雞煲、夜晚約啲friend」。Simon說罷，夏蕙姨忍不住插嘴，「我最鍾意就係完show之後去食飯！」
電影回顧夏蕙姨的一生，「我喺香港出世、香港長大，啲朋友又係香港嘅人」。當中她人生最難忘的章節，是60年代帶著雛鳳鳴劇團70人到美國巡迴表演，「當年有啲鬼佬日日嚟，同我食吓飯」，其中一人之後更遠赴香港見面敘舊，贏得「大鼻」之暱稱。Simon記得，「大鼻」在美國曾幫夏蕙姨報警找救兵，「當年佢（黃夏蕙）遇到黑幫人士打劫，呢個『大鼻』一個電話就搞掂」。夏蕙姨笑言：「嗰時我好後生，幾靚㗎！又本事，乜嘢都唔驚，槍林彈雨，個賊指住我，我話：『我唔係驚你真係想打死我，我驚你錯手開咗槍，我60人，到時你仲邊有得企？你鍾意錢就拎晒去』」。夏蕙姨指當時「梁醒波就喺度喊、個個都喊」，更著匪徒「拎晒幾千蚊走，唔好搞出人命」，最終警方截獲匪徒起回劫款，「我就當無事發生過」。
70年代夜夜笙歌：嗰陣時我好有錢
夏蕙姨思維跳躍，想到甚麼就說甚麼。問她最喜愛那個年代的香港，她由小時候走難說起，Simon欲把她的思緒拉回來：「人哋問你最鍾意咩年代呀！」夏蕙姨坦言：「幾十年前啦！唔記得幾時喇！」靠Simon幫她補白。她記得「日本仔打到嚟」之時，走難到廣州，直至和平才回港，「好掛住返到嚟之後嘅日子」，「細個讀羅富國，之後就升上庇利羅士」。最難忘但又「唔記得幾時的」，大概是香港的七十年代。夏蕙姨說，當年舊情人胡百全尚在人間，自己亦夜夜笙歌，「晚晚同啲artist（明星）食飯，鳳凰女、鄧碧雲、新馬仔，嗰陣時我好有錢、好犀利，後生有氣有力，揸住架Benz，萬萬都宵夜萬歲我出錢，嗰時我都唔知錢係乜嘢，見到乞兒都畀100蚊」。
戲內亦有情節談及胡百全，「我十八歲嫁咗畀佢，有咩法子唔係一生摯愛？」其時胡百全本身有家室，與夏蕙姨是無名份夫妻，更生兒育女。記者問她會否擔心現任丈夫潘炳烈（潘Sir）不高興？夏蕙姨答：「無得嬲㗎！我之前都無遇上到佢！」潘Sir有「香港賽車之父」之稱，現已移居美國，與夏蕙姨談遠距離戀愛，靠每日兩通電話維繫，「佢朝早起身就係我夜晚，每日打電話我梗係坐緊的士，『問我你返到未呀？』」一直傾談到夏蕙姨回家。
一談到潘Sir，夏蕙姨眉飛色舞。兩人在1983年結婚，雖然潘Sir是賽車手，但她形容「潘炳烈好斯文，係個好低調嘅人、好怕醜」。她小時就讀傳統名校庇利羅士女士中學，「我哋啲姑婆（一眾女同學）惡到呀！我又不嬲豪放啲。」，長大後遇上潘Sir，受其紳士風度吸引，「佢泊完架車會過嚟開車門畀我，我好唔習慣呢啲。突然有個gentleman紳士走嚟，你話我係咪覺得好特別呢！」她指潘Sir不愛社交，一個E人和一個I人走在一起，潘Sir也會陪她出席宴會飯局，「有時都係我逼佢，唔該你啦！畀吓面」。
夏蕙姨形容《夏蕙傳》「唔係嘢少」，邀得暫時不能開名的荷里活級巨星客串，Simon形容「呢個都係黃小姐嘅面子」。電影劇本基本上已寫好，正物色年輕版夏蕙姨的選角，「要搵個好似佢咁樣靚身材正嘅！」
場地提供：金紫荊生記粤菜廳
