2024年娛樂圈喜事連連 盤點結婚/生B/懷孕藝人！麥明詩盛勁為雙喜臨門

娛樂圈2024年喜事連連，唔少藝人都輪住報喜，宣布結婚、生B、懷孕成為準父母，充滿幸福粉紅泡泡。下文同大家回顧一下啦！

2024年懷孕篇

2024年懷孕藝人1. 黃翠如
黃翠如與蕭正楠結婚6年，為圈中模範夫妻。近年，黃翠如屢傳佗B消息，終於喺11月份，黃翠如於社交平台曬出淚流滿面拎住超聲波照片嘅自拍，公布懷孕喜訊，又透露曾經歷過小產，表示今年再得到神為佢哋送來嘅彩虹禮物，每日都帶着感恩又有點忐忑嘅心，滿載着愛及日夜期待。

2024年懷孕藝人2. 王君馨
王君馨與圈外老公Daniel拍拖11年，於2016年結婚，多年嘅遠距離戀愛修成正果，不過二人婚姻一度亮起紅燈，幸好佢哋尋求婚姻輔導幫助，成功破鏡重圓。王君馨於本月喺社交平台分享老公抱住孕肚親吻嘅照片，公布成功懷孕，更指係今年收到最好嘅禮物。

2024年結婚篇

2024年結婚藝人1. 黃美棋、鍾健威
黃美棋與鍾健威於今年4月份假西貢五星級酒店舉行婚禮，結束11年愛情長跑，星級姊妹團包括林淑敏、林奕匡太太李靄璣、盧頌恩、黃芳雯；婚禮現場除咗放滿新人婚照，更設有1998年電影《行運一條龍》茶餐廳場景，將戲中黃美棋嘅「小芬女」角色重現，黃美棋更於婚宴挑戰換8套衫，排場十足。

2024年結婚藝人2. 鄧卓殷、郭子豪
鄧卓殷和郭子豪於2019年拍拖，不時情侶檔工作及拍攝情侶短片大放閃光彈，恩愛非常。今年情人節，二人宣布訂婚並將於2025年4月舉行婚禮，同時大曬郭子豪於郵輪求婚嘅照片及巨型鑽戒。

2024年生B篇

2024年生B 藝人1. 連詩雅
連詩雅（Shiga）和陳家樂2019年合作拍攝節目TVB旅遊節目《12個夏天》結緣，低調拍拖3年，於2023年4月舉行婚禮；陳家樂於結婚1周年時更喺社交平台放閃，直言自己好幸運：「個個朋友都話我上世唔知做左咩好事，娶左個咁好既老婆，我覺得唔止上世，應該係做左十世善事，先可以今世成個大爺咁。」連詩雅於今年7月誕下愛女Camila，一向瘦底加上紥肚，連詩雅生完之後極速回復24吋纖腰，成為靚媽。

2024年生B 藝人2. 朱千雪
朱千雪與同年同月同日嘅青梅竹馬醫生男友吳昆倫（Justin）2019年結婚，今年元旦宣布懷孕喜訊，BB於5月平安出生，一索得男。朱千雪分享指，照顧一個小生命一點都不容易，需要重新學習，幸好老公對佢照顧有加，全程陪住自己，亦好樂意幫BB換片、洗澡及餵奶。

2024年雙喜臨門篇

2024年雙喜臨門藝人1. 麥明詩、盛勁為
麥明詩於1月時公布與盛勁為嘅婚訊，更分享求婚短片，自爆「反傳統」向男友主動求婚；二人於3月底舉辦3場「勁甜麥」婚宴，每場婚宴各有特色，幸福滿滿。結婚未夠一年，傳出有喜消息，麥明詩於11月陀五個月孕肚現身活動，表示即將進入一個新階段，又透露自己知道懷孕嗰一刻覺得開心和幸運，感恩有上天嘅祝福。麥明詩、盛勁為又於本月中舉行Baby Shower派對，率先進行投票選出腹中寶寶之名稱，當中有盛夏、盛載、盛事、盛裝等名字。

2024年宣布成為準新手爸爸媽媽嘅藝人更包埋許芷熒、高鈞賢、楊潮凱、賴慰玲、朱慧敏、吳紫韻、何依婷、陳芷尤，當中陳芷尤及高鈞賢更加係雙喜臨門，實在可喜可賀。此外，利愛安、何佩珉、陳法拉、朱千雪、陳嘉慧、「浩南」鄭伊琪、梁諾妍、「屯門娜娜」董幸兒、林奕匡、倪晨曦、文凱玲、陳雅思等等都榮升咗做父母，踏入人生另一階段。而於2024年拉埋天窗嘅則有伍仲衡、麥家瑜、Agent L曹梓冲與DJ女友Elsie、文凱玲與圈外男友Jason、電影《年少日記》導演卓亦謙、蔣家旻及王虹茵等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！