叱咤2024︳鄭欣宜盛傳現身頒獎禮復出 神隱近2年身處香港林海峰漏口風？

喺2021及2022年度叱咤樂壇流行榜頒獎典禮連奪「我最喜愛的女歌手」大獎嘅鄭欣宜Joyce，去年3月舉行完紅館演出後忽然銷聲匿跡。但近期有傳，欣宜可能會喺聽晚商台舉行嘅「2024年度叱咤樂壇流行榜頒獎典禮」上現身做嘉賓！

尋日林海峰同葛民輝孖住出席活動，年年都喺叱咤頒獎禮負責頒發「我最喜愛的」大獎嘅阿Jan，自然被記者問到欣宜係咪會去叱咤，而阿Jan亦當然帶大家「遊花園」一輪之後話「睇show就知」。

鄭欣宜神隱期間一度離港，有網民喺加拿大撞見Joyce去當地墓園拜祭亡母肥姐沈殿霞。但呢期欣宜又的確身在香港，尋日有網媒收到風Joyce喺中環食飯，於是趕赴餐廳外等候，後來欣宜現身但就禮貌婉拒採訪。

欣宜神隱初期一度被傳媒指佢掛住拍拖而「潛水」，Joyce嘅經理人林姍姍回應傳媒時就話「Joyce的確係病咗，療傷之中」，但並未交代具體情況。去年底Joyce為好友許廷鏗歌曲《一場同學》MV演出，又為動畫片《星願奇緣》擔任粵語配音，似為復出做足準備，不過之後欣宜又再消息杳然。早前商台DJ梁文禮發文話喺街上撞見鄭欣宜，仲問係咪要迎接對方復出？Joyce當時笑一笑同梁文禮話「畀啲時間我」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！