叱咤2024︳「我最喜愛的」各獎項5強名單 姜濤力爭追平張學友2項天王級紀錄
2024年度叱咤樂壇流行榜頒獎典禮將於元旦舉行，各個由樂迷投票得出結果嘅「我最喜愛的」男、女歌手、組合及歌曲大獎亦已於早前嘅投票中決出5強 －
叱咤樂壇我最喜愛的歌曲大獎5強
好得太過份 - 姜濤
以孤獨命名 - 陳卓賢
Hey Hey OK! - 盧瀚霆
普渡眾生 - 林家謙
黑玻璃 - 洪嘉豪
（由現場樂迷於頒獎禮當晚一人一票投選）
叱咤樂壇我最喜愛的男歌手5強
姜濤
陳卓賢
盧瀚霆
張敬軒
Yan Ting周殷廷
叱咤樂壇我最喜愛的女歌手5強
Gin Lee
JACE 陳凱詠
Serrini
陳蕾
鄭秀文
叱咤樂壇我最喜愛的組合5強
COLLAR
Dear Jane
ERROR
JFYT
MIRROR
（「我最喜愛的」男、女歌手及組合由樂迷網上投選，投票早前已經截止，得獎結果將於頒獎禮當晚公布）
MIRROR成員一如往年包辦多個「我最喜愛的」大獎嘅5強，男歌手同歌曲當中都佔3席。值得留意係，連續6年有歌曲入圍「我最喜愛的歌曲」最後5強嘅姜濤，過去4年已經奪得呢個獎。假如姜濤今年再度贏得「我最喜愛的歌曲」，就可以追平張學友同陳奕迅五度奪得「我最喜愛的歌曲」大獎嘅紀錄。同時姜濤今年入圍「我最喜愛的男歌手」大獎，假如得獎將會係佢第三次「封王」，並追平張學友及黎明三度成為「我最喜愛的男歌手」嘅紀錄。至於能否挑戰陳奕迅9次得獎紀錄，就要睇佢未來幾年嘅發展嘞。
另一大獎「我最喜愛的女歌手」方面，雖然近年香港女歌手聲勢未如男歌手般，但今年5強形勢更見平均。去年得主陳蕾今年未能保持聲勢，Gin Lee、JACE 陳凱詠同Serrini各自基本盤支持都唔弱，而前輩級嘅鄭秀文喺社交平台支持度唔差，好可能係黑馬！假如Sammi成為今年「我最喜愛的女歌手」，就會係佢事隔23年再度獲此殊榮。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
