JFYT床哥借Edan呂爵安緋聞拉票 保錡YT周殷廷被扯落水 姜濤親解留言鬧冇品「唔係一句講笑就冇事」（最新回應）

【11／27中午14:00】

姜濤今日出席活動時回應批評床哥「冇品」一事，表示完全唔認同對方，並質疑係咪一定要用呢個方法拉票。姜濤認為唔係一句講笑就冇事。

由網上團體JFFT同YT周殷廷組成嘅JFYT今年異軍突起，以新人姿態打入「叱咤樂壇我最喜愛的組合」最後五強，連帶出道多年嘅周殷廷都打入男歌手5強。呢個禮拜係終極投票周，JFFT成員床哥前晚開LIVE時拉票，但係言論焫埋其他單位，成為今日網路大花生。

床哥開LIVE時提到一旦得到叱咤獎，要多謝ERROR成員保錡同埋MIRROR嘅Edan呂爵安，並且再次拉票，叫因為Edan同緋聞女友林明禎一齊去台灣而「脫粉」嘅Edan fans，將叱咤選票改投俾JFYT同YT周殷廷，仲話「唔會去台灣」、「我地有晒女朋友有家室」、「我地會落區一齊拉票」，明寸鏡仔。床哥對於JFYT有力同MIRROR等團體爭獎似乎相當意外，但就話「今年2024年，可能係有史以來，MIRROR最感覺到危機嘅一年，點解呀？因為JFYT喺2024年終於出道喇。」

呢段拉票說話俾另一youtuber Ming仔紀錄落嚟，仲轉發到社交平台，好快就成為熱話。有人將JFYT呢段片tag咗姜濤，姜就公開留言批評床哥「無品」。而床哥之後就喺IG Story寫道「完全係我自己嘅責任，品德真係太缺了...」、「完全係我自己嘅責任，手指真係太肥了。（下略）」，諷刺幾年前姜濤以「手指太肥」解釋㩒錯like一事。

而被床哥鳴謝嘅保錡，就出IG story轉貼床哥片段，仲留言話「最緊要夠Kimochi，加油bro」。而剪片令事件廣傳嘅Ming仔亦將該片段收埋。